uMthunywa
YiNtatheli kaMthunywa
ICAMEROON ivuke “isingcwatshiwe” iphuma lomklomelo owodwa kuSerbia emdlalweni wesibili wesigaba samaqoqo kaGroup G kundebe yoMhlaba emdlalweni wenguqu.
Ukuthola umklomelo lo kuyifake ethubeni lokuthi yeqele kubanga elilandelayo kodwa okuzabaluleka yikuthi inqobe iBrazil ngoLwesihlanu.
ICameroon ibekwe phambili nguJean-Charles Castelleto. Kodwa uStrahinja Pavlovic loSergej Milinkovic-Savic baphendulele iSerbia ngesikhathi unompembe esengeze imizuzu esigabeni sakuqala.
Brazil
Kusigaba sesibili somdlalo u-Aleksandar Mitrovic uhlohle ibhola leSerbia elesithathu ngaphambili kokuthi uVincent Aboubakar lo-Eric Maxim Choupo-Moting babuyisele iCameroon emdlalweni.
Ukuthola umklomelo owodwa okwenziwe yiCameroon, edliwe yiSwitzerland ngo-1-0 emdlalweni wokuqala, kuyibeka ethubeni lokudlulela esigabeni esilandeyo.
ICameroon ingene enkundleni sekusabalele indaba zengxabano enkambeni yayo. Kuvele ukuthi umqeqetshi, uRigobert Song, uxabane lonozinti, u-Andre Onana, ovimbela i-Inter Milan eye-Italy bebanga ukuthi umqeqetshi lo ufuna atshintshe isitayela sakhe sokuvimba, ayekele ukuphuma phuma egedini.
Vincent Aboubakar
Kuthiwa u-Onana, obevimbile emdlalweni wokuqala leSwitzerland, wenqabile. Lokhu kudale ukuthi akhitshwe eqenjini, kufakwe uDevis Ebassy odlala eSaudi Arabia.
ISerbia yiyo eqale kahle umdlalo, ihlasela kodwa isehluleka ukusebenzisa amathuba. Ithuba elicacileyo liwele kuMitrovic kodwa ibhola lakhe litshaye igedi.
Emva kwalokho iCameroon izamile ukuziqoqa, yaqala ukuhlasela. Elinye lamathuba ambalwa ilisebenzisile ngesikhathi uCastelleto evalela phakathi ngomzuzu wesi-29. ISerbia iqhubekile ngokuhlasela. Kucine kuyilungele ngomzuzu ka-45 ngesikhathi uPavlovic ephosela phakathi ibhola elikade liyi-free kick. Ngemva kwemizuzwana, uMilinkovic-Savic uhlohlele iSerbia ibhola lesibili.
Inguquko eyenziwe nguSong ibelezithelo ngesikhathi u-Aboubakar ehlohlela iCameroon ibhola lesibili ngomzuzu ka-63. Ngemva kwemizuzu emithathu, uChaupo Moting utshaye elesithathu.
