Uncategorized

Iviki yamasiko izakuba khona ngoNkwenkwezi

22 Apr, 2021 - 00:04 0 Views
Iviki yamasiko izakuba khona ngoNkwenkwezi

uMthunywa

YiNtatheli kaMthunywa
ISIKHUMBUZO salonyaka seviki yamasiko, sikhangelelwe ukubakhona ngeviki yesibili yenyanga kaNkwenkwezi.

Umkhosi walonyaka uzaqhutshwa ngaphansi kwendikimba ethi “Ukuqina ekuvikeleni ubuciko kanye lokwehlukana kwamasiko”, imikhosi le izakwenziwa ebulenjini kunkundla ezehlukeneyo ezibalisa iFacebook, Twitter, TikTok, YouTube, kumabonakude kanye lasemsakazweni.

Kusitatimende, iNational Arts Council of Zimbabwe (NACZ) ithe indikimba yomkhosi isuselwe ekwamukeleni ukuthi loba uhlangothi lwezobuciko luthintekile kakhulu ngenxa yobhubhane lwe-coronavirus, iqhubeke ngokuqina ngokunjalo iviki yamasiko inikeza ithuba lokugubha, ukugqugquzela ubuciko kunye lokwehlukana kwamasiko.

“Iviki yelizwe lonke yamasiko izavulwa ngokusemthethweni mhlaka 15 Nkwenkwezi ngemva kwalokho imicimbi izahlelwa njalo iqhutshwe kuzabelo ezehlukeneyo ngaphansi kweNACZ. Ngokunjalo iNACZ isiqalisile ukuqoqa abathintekayo kanye lokulungisa ubuthungameli ukuze kulungiselelwe iviki le eqakathekileyo yomnyaka.

Lo ngumnyaka wesibili umkhosi lo uqhutshwa ebulenjini ngenxa yemithetho ekhona yeCovid-19 ngemibuthano,” kutsho isitatimende.

Umkhosi lo wamasiko ozaqhutshwa iviki yonke, uzabe ulemigido, izingoma, amafilimu, amabhayisikopo, ezobuciko, izingwalo, inkondlo kanye lezabomahlekisa.

UManeja obona ngokukhitshwa kwembiko kanye lezokukhangisa kuNACZ uRodney Ruwende uthe iviki yamasiko yalonyaka igujwa ukuze kulethwe ukubambana lokuhlangana komphakathi ngobuciko kunye lamasiko ngesikhathi kuleCovid-19 kanye lemithetho ebekwayo ebangela ukwehlukaniswa kwezimuli kanye lamasiko.

Share This:

Sponsored Links