Ethel Ncube loThando Dube
KUBE luthuli izakhamizi zeKopa eNyathi zitshaya itoyi toyi enkambeni yamapholisa eNyathi zikhankasela ukukhululwa komphurofethi oveze amagama ama-satanist abeseqede abantu esigabeni.
Bekulokungunguna esigabeni seKopa ngokufa kwabantu abane ngemva kwesikhathi esifitshane okubikwa bebesifa ngendlela ezingazwisisekiyo okucine kubangela ukuthi babize umphurofethi uSiziba wakoBulawayo ukuthi azobasiza.
Umphurofethi uSiziba uke wabatshazwa ngokwehlulwa ngondofa beCowdray Park owaziwa ngokuthi nguMaqobola.
Omunye wezakhamuzi zakule indawo ongathandanga ukuqanjwa ngebizo uchaze ukuba abantu sebephelile njalo bebevele bekholwa ukuthi kulabantu abalesandla kulokhu.
“Abantu besebephelile ngokuzibophela lapha, omunye laye kubikwa wafa ngemva kokuphaquza imbanje, omunye wabhewuka wafa konke lokhu kwenzakala ngesikhathi esifitshane nje okwenza abantu bacabangela ukuthi kukhona okutshaya amanzi.
“Kungakho-ke umphurofethi uSiziba owabizwayo uthe efika ezolungisa waseveza ihlekana labantu elilesandla ekufeni kwabantu,” kutsho isakhamuzi lesi.
Siqhubekele phambili sathi lababantu okucatshangelwa ukuba balesandla ekufeni kwabantu basebesiyabophisa umphurofethi uSiziba besithi uthi bangabathakathi.
“USiziba waqamba abantu abambalwa ukuthi yibo ababulala abantu. Phakathi kwalabo bantu kwavela ukuthi abanye babo bangena enye isonto okucatshangelwa ukuthi ngeyama-satanist.
“Kungakho izakhamizi beseziqalisile ukuxotsha abantu abakhonza kuleyosonto. Phakathi kwalabo bantu abacatshangelwa ukubulala kulabosobhuku abaqanjwayo. Lokhu kwabangelwa ukuthi bambophise.
“Umphurofethi uvalelwe ngemva kokumangalelwa kodwa abantu sebetshaya itoyi toyi bathi ubotshelwani kakhululwe ngoba uzobasiza,” kuchaza isakhamuzi lesi.
Ngesikhathi sokudindwa kwephephandaba umphurofethi lo ubelokhu evalelwe esitokisini.
Isikhulumi samapholisa esabelweni seMatabeleland North uInspector Siphiwe Makonese uthe ubengakawamukeli umbiko lo.
“Kangikawutholi umbiko lo, ngizadingisisa ngawo,” nguInsp Makonese lowo.