uMthunywa
Wayne Ncube
ITHEMBA kalibulali, nanko phela iqembu laMahlolanyama kalimanga ukuzilungiselela ngokufika komkhuhlane we-coronavirus.
Ekhuluma loMthunywa umsekeli kamqeqetshi weBosso uMandla “Lulu” Mpofu ubikele iphephandaba likaZulu ukuba abadlali beqembu leHighlanders FC bayazilolonga ukuze bazithole beqinile kuqala umqhudelwano wePremier Soccer League (PSL).
“Lokhe sizilungiselela ukuthi lapho okuqala khona imidlalo sitholakale siqinile njalo silethemba lokwenza kuhle lapho okuzaqala khona iligi.
“Abadlali kasibafaki engozini yokubamba umkhuhlane lo ngoba lathi njengabaholi beqembu leli sikhathazekile ngomkhuhlane osuthe ukubulala abantu abanengi,” kulandisa uMpofu.
Iqembu leBosso linjalo liqhubeka ngamalungiselelo eligi sebethethe isikhathi bahlanganisa indlela zokuzivikela kumkhuhlane we-coronavirus lapho abadlali abalama-sanitiser, behlukanisiwe isikhathi zokugijima njalo kabasagijimi nsuku zonke.
“Sehlukanisile iqembu, kasihlangani sibe banengi ngesikhathi esifanayo, sokuhlanganwa ngoLwesibili, Lwesithathu, Lwesine kanye loMgqibelo njalo phakathi kwamalanga lawa abanye baya e-gym abanye bayabe begijima enkundleni abanye besenza ama-drills.
“Kunengi esesikwenzile njengeqembu ukuze sivikele abasebenzi kanye labadlali, phakathi kwenkundla sokufakwe amanzi okunatha aphindiweyo ukwedlula okwensukwini, kuyagezwa izandla njalo nje,” kuchaza uMpofu.
Amaqembu wonke akuPSL kugoqela labadlali beminye imidlalo bayakhuthazwa ukuba kabaqinisekise ukuhlanzeka ngazo zonke izikhathi ngesikhathi lesi esinzima esegcikwane le-coronavirus.
