uMthunywa
YiNtatheli kaMthunywa
IQEMBU le-Talen Vision liyakubona ukuthi selidinga iqhinga elitsha lokunqoba ngokubiza omunye umqeqetshi uMark Mathe ebhentshini.
UMathe usengumsekeli kamqeqetshi walithimu uMkhuphali Masuku njalo uqale umsebenzi ngoLwesihlanu iTalen Vision idlala leBosso 90.
UMathe ungenele indawo kaXolani “Skweya” Nkundhlande okubikwe ukuba usezaqeqetsha iqembu labasakhulayo elikuDivision Two.
Iphephandaba likazulu likhulume lomnikazi weTalen Vision uKhumbulani Nkomo obike ukuba isizatho sokubiza uMathe ngesokuqinisa iqembu.
“UMathe sizakhulumisana laye. Ukuba khona kwakhe eqenjini kuyimizamo yokuthi sibise ulwazi olujulileyo phezulu kwalolu olukhona kubaqeqetshi,” kutsho uNkomo.
UNkomo uthe bakhangelele ukuthi baphakame baye kuligi enkulu eye-Premier Soccer League, okuyikho okwenza bathembele ukuthi abaqeqetshi abakhona loMathe bazadinga amaqhinga okuthi iqembu linqobe.
ITalen Vision ikunombolo yesibili ilemiklomelo engu-58 isalele emuva kweBulawayo City ngemiklomelo emithathu.
Ngokuhlaziya isimo seligi, kusobala ukuthi nxa iTalen Vision inganqoba kumidlalo ezayo, izabizwa intshantshu kaDivision One.
Ekhuluma loMthunywa kuliviki uMasuku uthe utshele abadlali bakhe ukuthi bengatatazeli. Ngomnyaka odluleyo leliqembu kwakukhangelelwe ukuthi leqe umzila lingene kuligi ezwayo kodwa lakhutha ugatsha kancane.
Kumasizini amabili adluleyo iTalen Vision yilo iqembu elithola udumo ngethalenta elilalo nanko phela abadlali balo bebehlohla ukwedlula abamaqembu amakhulu kuleli.
