uMthunywa
UJURGEN Klopp, oqeqetsha iLiverpool, usexwayise amaqembu abanga laye isicoco seEnglish Premiership ukuthi usezaqinisa abadlali bakhe okuzwayo njengoba sebekhokhela ilogu kulandela ukunqoba kuliviki.
IJalimane lithi alethuswa yilutho njalo lokunqoba kweManchester City iqembu elibahlezi emuva angeke kumlalise phandle.
“Abadlali bami basezingeni eliphezulu okwamanje ngoba sebebona ukuthi sesibanga emaphethelweni esizini. Kujwayelekile ukuthi kubelesiphithiphithi ngalesi isikhathi nxa sekubangwa impumela.
“Bonke abantu kumele bazi ukuthi sisalenqwaba yomsebenzi okumele siwenze, kodwa abadlali sibalolonga okuqinileyo. Kufanele senze umsebenzi manje,” kutsho uKlopp.
ILiverpool iyawabasela amabhola emambuleni nanko uKlopp ubika ukuba uyakuthakazelela ukuvuka khwatshu kukaMohamed Salah loSadio Mane.
UMane utshisile kulisizini lokhe watshiyelwa ijesi unombolo-10 elatshiywa nguFelippe Coutinho waseBrazil nosekwiBarcelona.
Kubikwa uCoutinho kubukeka ephakathi komhlane lembeleko kwelokukhetha iqembu azodlala kulo nxa ephetha ngokutshiya iBarcelona ngoNhlangula.
Ngemva kwenyanga ezingu-16 ekuBarcelona umdlali lo akufihlwa ukuthi akaze angene egiyeni.
Indaba eziphuma enkambeni yeBarcelona, ziveza ukuba kuvela iManchester United, Chelsea leParis Saint Germain (PSG) ngamanye amaqembu aseke abuza ngaye.
IChelsea kubikwa ifuna ukuthi angene endaweni ka-Eden Hazard, laye osekulesikhathi ekhonjwa kuReal Madrid.
