Nkosilathi Sibanda
ABAKHALI nje abasekeli lentatheli zeNgilandi ngokugcwala kwabonondindwa lamakhosikazi abadlali balesisizwe duzane lenkamba yalithimu kumqhudelwano we-World Cup oqhutshelwa eRussia.
Ngenxa yokuduma kobungcitshi babadlali beNgilandi, intatheli zemidlalo eziseRussia zibika ukuba bekuzamangalisa ukuswelakala kwabesifazane abafuna ukuchitha isikhathi labo. Izazi zomdlalo webhola lenyawo zithe ukuvakatsha kwamakhosikazi labanye abesifazane kuyinjwayelo enkambeni yeNgilandi kumincintiswano yaphezulu.
Loba kungavunyelwa ukuthi kuze owesifazane enkambeni, kubikwa kuyehlula ukuthi izikhulu zeqembu zikuvikele lokhu kwesinye isikhathi.
INgilandi ingenye yamaqembu asephumelele ukuyancintisa kusigaba sama-quarter-final lapho ezahlangana khona lesizwe se-Sweden.
“Abadlali besizwe seNgilandi baphuma nsuku zonke emakhasini amaphephandaba ase-Europe. Bayathandwa abadlali laba ngakho akumangalisi ukuthi bavakatshelwe ngamakhosikazi abo labonondindwa abazama inhlanhla. Akumangalisi ukuthandwa kwabo ngoba baphuma kuligi elandelwa ngumhlaba wonke,” kutsho esinye isazi somdlalo.
Kubikwa ukubonakala kwamakhosikazi abadlali kwenze abalandeli basola ukuzimisela kwabadlali lokuthi abesifazane laba bazaphazamisa ukudlala kwabafana.
“Bafuna ukuphazamisa iqembu. Yinto abahlala beyenza ngakho ngiyasola. Okweminyaka eyedlula itshumi sihlala sibona indlela abesifazame abaphazamisa inguqu yethu,” kutsho uMike Ridley owe-The Sun.
Kwabesifazane abakhona kubikwa kuhlonitshwa uRebekah Vardy ongunkosikazi kaJammie Vardy.
URebekah nguye owakhokhela zonke izithandwa zabadlali kumcimbi owenzelwa eMoscow ngemva kokunqoba kweNgilandi phezulu kwe-Columbia.
Umqeqetshi weNgilandi uGareth Southgate kazikhathazi ngokuphazanyiswa kwabadlali bakhe ngoba uthe ufuna babeseduzane lezithandwa zabo.