uMthunywa
YiNtatheli kaMthunywa
INHLANGANISO ephethe umdlalo wokugijima koBulawayo ibika ukuba iphezulu kwamalumgiselelo womjaho walonyaka owe-Old Mutual Nkulumane okukhangelelwe ukuthi ubize inengi labantu kulandela ukumemetheka kwalumdlalo.
Kubikwa ukugijima sekungumdlalo osulodumo koBulawayo nanko phela imijaho eqhutshwe kunyanga ezedluleyo ibikhwabithwa langabantu abangakaze bancintise kumdlalo wokugijima empilweni zabo.
Ekhuluma ngamalungiselo omjaho we-Old Mutual Nkulumane ozakuba khona mhlala 2 Nhlangula elokitshini leNkulumane, umgcinisihlalo weBulawayo Athletics Board uManuel Mpofu uthe lonyaka akubizwa ozwayo.
“Lonyaka kuzancintisa abanengi kumjaho wethu we-Old Mutual Nkulumane. Sinxusa wonke umuntu ozizwa eqinile ukuthi azogijima lumango abhalisa ngoba sekuseduzane. Lonyaka umjaho wengeziwe ngoba sekule-21km,” kutsho uMpofu.
UMpofu uthe ngokuma manzonzo kwesimo somnotho welizwe, kuyabajabulisa ukuthi umdlalo wokugijima ulokhe uthola usekelo kumankampani afana le-Old Mutual.
“Kuyajabulisa kakhulu ukuthola ukuthi umdlalo wokugijima ulosekelo olukhulu oluvela kumankampani amakhulu. Sibonga inkampani ye-Old Mutual ngosekelo lwayo isikhathi sonke. Inhloso ihlala ingeyokuthuthukisa umdlalo wethu, sinikeze labasakhulayo ithuba lokuthi bazibonakalise emphakathini,” kutsho uMpofu. Kulumjaho kubikwa wonke amahlandla azakuba lemivuzo engcono kulaleyo eyanikezwa ngomnyaka odluleyo. Abagijimayo bazancintisa kumahlandla e-21km, 10km, 5km leye-wheelchair.
Kumncintiswano odluleyo, kwagijima leqembu leHighlanders Athletics Club elalichinsa ukuncintisa ngemva kweminyaka.
Ithimu yokugijima le yasungulwa kulandela ukuthakazelela ukufikisa kweqembu leHighlanders iminyaka engamatshumi ayisitshiya galo lunye lanye.
UMpofu uthe kungumbono wakhe ukuthi idolobho lenze imijaho eminengi okuyikho okuzavuselela lumdlalo, kuphakamise lesisindo sedolobho.
Kungumbono kaMpofu ukuthi imincintiswano enjenge-Old Mutual Nkulumane izancedisa abagijimi abadabuka kuBulawayo ukuthi balungiselele lemincintiswano emikhulu elizweni.
Sekuvele ukuthi inengi labagijimayo abavela kuleli idolobho liyehluleka ukuphatheka emncintiswaneni ephezulu ngenxa yokuthi abenzi kuhle.
Lakhathesi kwehlula ukuthi abagijimi kunqobe abaphuma koBulawayo lakwezinye indawo kulumhlubulo welizwe.
