Isisekelo esitsha kuBosso

26 Jan, 2023 - 00:01 0 Views
Isisekelo esitsha kuBosso Amalunga eBosso alandela ukuqhutshwa komhlangano jikelele ngomnyaka ophelileyo

uMthunywa

YiNtatheli kaMthunywa

UKUDONSELANA intambo kunkokheli lezisebenzi zeHighlanders kuzaxazululwa nxa amalunga uqobo aleliqembu engavumelana lesisekelo sombuso esizakwethulwa ngeSonto.

Kuzakuba yimpelaviki elindwe ngabomvu eqenjini nanko phela sekubikwe ukuba kulandela isaziso se-AGM esakhitshwa ku-Sunday News yamhlaka 8 Zibandlela 2023, lesi yisikhumbuzo kuwo wonke amalunga akusimo esiqondileyo ukuthi ukwethulwa kwesisekelo sombuso kuza kubamqoka. 

Kusaziso, inkokheli zeBosso zibike ukuthi umhlangano uzagxila kusisekelo sombuso. 

Njengokwethulwa yikomithi eyaphiwa umsebenzi wokukhangelisisa inguquko efunwa ngamalunga, kuzwakale ukuba umaqhuzu weqembu uzanikezwa amandla okuphatha imisebenzi ethile ebibanjwa langunobhola wequla le-executive.

Lokhu iBosso ikwenze ihlose ukuthi ilandele imthetho ephawulwe yinhlanganiso yeFifa, ikakhulu kuziqephu ze-club licensing. 

Uhlelo lwe-club licensing luhlose ukuthuthukisa ibhola emaqenjini kundawo ezibalulekileyo ezibalisa ukuphatha amaqembu ngendlela eqondileyo, kunye lokuthuthukisa umdlalo kwabasakhulayo. 

Ukwakha lokugcina inkundla ngendlela evikela abalandeli kuyingxenye yaloluhlelo.

Yikho kwabalequla labalandeli beBosso ababeka umbono wokuthi akulungisiswe isisekelo sombuso ukuze kulandelwe okufunwa yiFifa.

Nxa amalunga engavumelana lenguquko, kutsho ukuba zikhona inkokheli ezizakwehliselwa imthwalo, ikakhulukazi unobhala lomgcinisikhwama.

Omunye wamalunga eBosso uNduduzo “TeeKay” Ncube utshele intatheli yephephandaba likazulu ukuthi ukuguqulwa kwesisekelo sombuso kulinyathelo elihle.

“Okwakhathesi akulanto engiyisolayo ngokuthi kube lenguquko ezaphakamisa indlela esikhokhela ngayo iqembu,” kutsho uNcube.

UNcube ukhuthaze bonke abangamalunga uqobo ukuthi baqale ukuzwisisa okumunyethwe yisisekelo sombuso, andubana baye emhlanganweni.

“Umhlangano ungeSonto ngakho asambeni siyecela ukubala ngesisekelo sombuso kuqala. 

“Kuqakathekile ukuthi sithole ulwazi, senqabele ukuthi siqede isikhathi siphikisana. Wonke umuntu obhadale ngokugcweleyo ukuba                              lilunga leHighlanders, ngithi asambeni siyelungisa.”

Kusenjalo, ngaphandle kwesisekelo sombuso, ukubunjwa kwequla labadlali beHighlanders kulisizini lakho kukhangelelwe ukuthi kukhokhele indikimba yomhlangano.

Amalunga ayedlula ikhulu akhangelelwe ukuthi athi gwaqa koBulawayo lapho elinde imbiko ezakwethulwa zinkokheli abazivotela ezihlalweni.

Kuqhutshwa lumhlangano ngesikhathi amaqembu akuligi yeCastle Lager ephakathi kokuthenga lokuthengisa abadlali, kulungiselelwa ukuqala kwesizini.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds