uMthunywa
Thokozile Mbedzi
ZISADIDEKILE izisebenzi zemgodini weStella City B eMaphisa ngemva kokuba esinye isisebenzi sithe sifuqa ibhala ebile-gold ore sitshelele safa.
Kubikwa uHonest Dube oleminyaka engu-29 yokuzalwa utshelele wafa ngeviki ephelileyo ngesikhathi efuqa ibhala emsebenzini.
Ekhuluma lentatheli kaMthunywa uInspector Loveness Mangena uqinisekise ukufa kwesisebenzi semgodini weStella City B ebesifuqa ibhala ebile-gold ore esitshelele safa.
U-Inspector Loveness Mangena
“Kulesisebenzi esithe siqhuba umsebenzi waso lezinye sathi sifuqa ibhala ele-gold ore isiya ku-milling plant satshelela safa.
“Isisebenzi lesi ekutsheleleni kwaso siwele ku-conveyor belt ehle yasibandezela ezinsimbini salimala kakubi. Ngokuswelakala kwenhlanhla behlulekile ukuthi basisize ngoba sihle safela lapho,” kulandisa isikhulumi samapholisa uInsp Mangena.
Indaba le yabikwa emapholiseni afika azophenyisisa.
“Njengamapholisa kasifuni ukuthi kube ngitsho lomphefumulo womuntu oyedwa odlula emhlabeni ngenxa yengozi ebezingavikeleka.
“Kungakho amapholisa axwayisa labo abasebenza emigodini ukuba kabaqakathekise ukuba abantu bavikelekile ngaso isikhathi ukuze ingozi ezifana lale zingabi khona njalo. Sikhuthaza abanikazi bemigodi ukuthi balandele izixwayiso zokuvikeleka kwendawo zokusebenzela,” kuphetha uInsp Mangena.
