uMthunywa
Sikhumbuzo Moyo
IKHANSILI ebona ngokulotshwa kwemihloliso kuleli eyeZimbabwe Schools Examination Council (Zimsec) isiveze ukuthi impumela ye-Advanced Level yomnyaka ka-2022 isiphumile, kukanti akukacaci ukuthi eye-Ordinary Level iyaphuma nini kulandela ukuvela kwembiko yokuba bakhona abafundi ababona amaphepha emihloliso ingakabhalwa.
Kubikwa imihloliso ebalisa eyeNombolo (Mathematics), isiLungu kunye le-Intergrated Science ngeminye eyabonwa ngabafundi abedlula i-600 bengakangeni kumihloliso le.
Isikhulumi seZimsec uNkosazana Nicky Dlamini uthe ngomnyaka ka2022 kwabhala abafundi abangu-37 518 imihloliso ye-Advanced Level kukanti isilinganiso sokuphumelela siku-84,67 percent.
Abafundi bayenelisa ukuvula impumela yabo ebulenjini.
