Lovemore Dube
KUZABA yisiphithiphithi koBulawayo kunyanga ezayo lapho okuzabuthana khona abantwana bamazwe amahlanu kumidlalo yesigaba seSouthern Africa.
Imidlalo le ibizwa Confederation of Schools Sports Associations of Southern Africa. Ibhekane lemidlalo yabantwana besikolo abakuma-primary alama-secondary schools kusizwekazi seSadc. Kuyindlela yokuletha abantu ndawonye bazane kungqungquzelwa ukubambana kwabantu lokuqhelisa ubuhlobo bamasiko.
Phela abaNsundu bayahlobana, behlukaniswa yimingcele eyabekwa ngabeLungu. Kuzabe kuleEswatini, Lesotho, Malawi, Zambia leZimbabwe bencintisana ekugijimeni lakumidlalo evamileyo eyebhola egoqela umdlalo wokuqaga, unobhutshuzwayo, handball le-basketball.
UCephas Mutumhe wazise iphephandaba likaZulu ukuthi amalungiselelo onke aqhubeka kuhle.
NgoMvulo inkokheli zamazwe zikhokhelwa nguArthur Maphosa umphathi weGwanda High School, zifike koBulawayo zizokhangela indawo lapho okungadlalelwa khona lalapho abantwana abazahlala khona.
Bethekelele iWhite City Stadium okuyinkundla yokugijima kunye lomdlalo wokuqaga. Bahlole leLuveve High School okwakulomnakano wokuthi kungadlalelwa khona leli elibhansulwayo (i-volley ball). Bathi besuka lapho babona eNorthlea okulendawo yokuthi abantwana balale khona njalo kudlalwe le-handball.
OGifford, Founders, Eveline laboMilton leTownsend bazabaphakathi komncintiswano lo. Ekhanya esuthisekile ngabakubonayo uMutumhe uthe izethekeli zabo zisuthisekeli ngabakubonayo njalo kwasekusiba lokudonselana kubangwa ukuthi ngobani abazakhangela isikolo esithile kusukela mhlaka 25 Ncwabakazi.
“Sisuthisekile ngesikubonileyo. Loba lamuhla umncintiswano ingaqalisa,” kutsho uMutumhe onguye ozibambileyo kulezinsuku kuNational Association of Secondary School Heads ephathele uMaphosa kulezinsuku ongumongameli weCossasa.
