uMthunywa
YiNtatheli kaMthunywa
KUZABE kuguga othandayo ngempelaviki kumkhosi omkhulu weChibuku NeShamwari Dance Festival, owokuncintisana kwamaqembu kumigido lemculo yesiNtu.
Umkhosi lo uzakuba khona ngoMgqibelo mhlaka 28 njalo uzaqhutshwa kuzabelo zonke, kudingwa amaqembu alobungcitshi kwezogiya ngemigido yomdabu. Imncintiswano yangoMgqibelo le iyendlalela umncintiswano wezabelo ozalandela kunyanga ezizayo.
IChibuku Neshamwari Dance Festival le ngumncintiswano osekelwa yinnkampani yeDelta Corporation ngenhloso yokuthuthukisa ezamasiko kuleli.
Umaqhuzu wezokukhulumisana lobudlelwano kuDelta Corporation uPatricia Murambinda uthumele iphephandaba likazulu umbiko wokuthi umncintiswano wabo uphenduke lonyaka uvutha.
“Lo ngumncintiswano omqoka ekuphakamiseni lokugcina imigido yesiNtu, okungeminye yamagugu ethu abalulekile okumele siziqhenya ngawo,” kutsho uMurambinda.
“IChibuku NeShamwari Dance Festival izakuba lemincintiswano yokugida lapho abazabe bevela eziqintini ezilitshumi zelizwe abancintisana kubangwa umvuzo wemali. Amaqembu amathathu azaphuma phambili azothola imvuzo le.
“Lokhu kuzayendlalela umncintiswano omkhulu, lapho abaphumeleleyo kuzabelo zonke abazancintisana ukuze kutholwe intshantshu.”
UMurambinda uthe imigido lemculo yesiNtu idlala indima ebalulekileyo ekulondolozeni amasiko.
Kuminyaka edluleyo, umncintiswano lo obunxusa labathungi bezitsha zesiNtu, amangqongqo lokubukiswa kwempahla zakhathesi ezikufeshini kodwa zithungwe ngendlela echaza amasiko lomdabu.
