YiNtatheli kaMthunywa
KUBE yisikhathi sakhe njalo uTonderai Ndiraya, okhokhela iqembu leSimba Bhora kusicoco sayo sakuqala senkezo yeCastle Lager.
ISimba Bhora ithwele isicoco esikhulu kunguqu yakuleli kulandela ukunqoba kalula phezulu kwe-Arenel 1-0 enkundleni yeLuveve ngoLwesine. Iqembu leShamva leli limangalise inengi labalandeli benguqu ephakemeyo nanko belichinsa ukudlala lezinkulu kuPSL.
Ambalwa amaqembu asenelise lokhu kuleli. ISimba Bhora idlule ihamba phezulu kwazo zonke, yaze yakhethuza lezinkulu ezibalisa iHighlanders, Dynamos leCAPS United. Kalizange livume ukunqotshwa enkundleni yalo yeWadzanayi, iqembu likaNdiraya.
Kusiya fika iviki lemidlalo yetshumi kuligi, besekusaziwa ukuthi akuphunywa enkundleni yeWadzanayi. Bekuyinkundla yokuhlinzela ezinye.
Okwenziwe nguNdiraya labadlali bakhe kuyancomeka.
Ukuze ayethola umsebenzi wokuqeqetsha iSimba Bhora, uNdiraya wayesuka ngokuxotshwa kuDynamos. Akula obecabanga ukuthi angenza okuhle ngokuguqula iqembu elitsha kuPSL, alenze intshantshu kumnyaka walo wakuqala.
Kuke kwaba lesikhathi kulisizini lapho iSimba Bhora eyekethise khona yazithola isibangwa lezibili kusigaba se-relegation kodwa abanikazi beqembu baqhubeka bekholwa ukuthi uNdiraya uzabafikisa eKhenani. Lakanye ukwenzile.
UNdiraya ulobe imbali ngokuba ngumqeqetshi wakuqala ukuphakamisa inkezo yeCastle Lager PSL leqembu elidabuka esabelweni seMashonaland Central.
