Isililo iCorona ihlwitha iqatha emlonyeni wamaciko eMzansi

18 Mar, 2020 - 19:03 0 Views
Isililo iCorona ihlwitha iqatha emlonyeni wamaciko eMzansi UDJ Maphorisa ungomunye wamaciko aseveze ukukhala njengoba sekuvalwe imicimbi enabantu abangu-100 kuya phezulu kuleli

uMthunywa

SIKHULU isililo kwezokuzithokozisa kweleMzansi ngemva kokuvela kwezindaba zokuthi izamiswa imicimbi ngenxa yegcikwane leCoronavirus. 

Umfelandawonye wezobuciko, iCultural and Creative Industries Federation of South Africa (CCIFSA), uzwakalise ukukhathazeka ngokumiswa kwemicimbi.

“Kwabasebenza khona, amaciko labathengisa ukudla kutsho ukungangenelwa mali. NjengeCCIFSA siphakamisa ukuthi uhulumende kube khona inkece oyinika amaciko labasebenzi ngalesi sikhathi,” kutsho umongameli walo mfelandawonye uJoy Mbewana.

Uthe ingxenye yemali yokubhekana lale nhlekelele kumele inikezwe abaculi okuhoxiswe imicimbi akade bemenywe  kuyo.

Uthe uzahlangana loNgqongqotshe wezobuCiko lamaSiko kuzwelonke, uNathi Mthethwa, ukukhuluma ngalolu daba lokuthi imali kumele ihlukaniswe njani.

“Sikhathazekile ngengane zamaciko ezikolo ezikweledayo lalabo abakweleda izimota lemizi. Sizohlangana leNedlac (National Economic Development and Labour Council) ukuthola isisombululo,” kutsho uJoy.

Osazisayo emikhakheni ehlukene uveze ukuthi lesi simo sitsho indlala njengoba imali ingeke ingene. 

Umculi we-hip hop, uNadia Nakai, uveze ukuthi amaciko azobhekana lendlala njengoba kuvalwa imicimbi.

“Lokhu kubi emacikweni njengoba abantu abangaphezu kuka-100 bengasadingeki emcimbini, kunzima.” Umethuli wezinhlelo, u-Ayanda Thabethe, laye uveze ukuthi okuzokwenzakala emacikweni kunzima.

“Ukuba sendimeni yobumnandi esikhathini samanje akumnandi ngenxa yokuqubuka kweCorona.”

UDJ Maphorisa uveze ukuphatheka kabi ngokuvalwa kwemicimbi okukhona kuyo owakhe iScorpion King Live ebizoba ngenyanga ezayo ePitoli.

“Inengi lemicimbi obekumele ngibe yingxenye yayo imisiwe, lokhu kutsho okubi kithi,” kutsho uMaphorisa. 

Umculi wokholo, uMalusi Mbokazi, uthe kubuhlungu ngoba uthola izincingo kubahleli bemicimbi akade ezoba yingxenye yayo beyihlehlisa. “Le nto ibuhlungu, kade ngithola izincingo zingitshela ukuthi umcimbi ebengiyingxenye yawo usuhlehlisiwe, lokhu kutsho ukuthi sizolamba-ke bakithi,” kuchaza uMalusi.

Umculi kamaskandi, uKhuzani Mpungose, uveze ukuthi isimo ubona sizoba nzima njengoba kungekho la abavuka baye khona beyobamba amatoho.

“Kodwa-ke impilo ibalulekile bakithi, konke okutshiwo nguhulumende asikulalelisise, sikwenze njengoba impilo ibalulekile. Lokhu kuhlehliswa kwemicimbi akuzosindisa nje impilo yethu sodwa kodwa leyabo abalandeli bethu abazobe bezosibuka. Siyanxusa ukuthi abantu bahlale ezindlini futhi siyathemba ukuthi ososayensi kukhona abakwenzayo masinyane ukuthola ikhambi elizonqanda igcikwane,” kuchaza uKhuzani.

Share This:

Sponsored Links