Siphathokuhle Ngulube
Salibonani bafundi. Ngithemba liqhuba kuhle ezifundweni zenu kanti njalo iphepha likazulu liyaliphathisa kakhulu ekwazini izindlela zokuziphatha esintwini kanye lesiko nje jikelele.
Ngeviki ephelileyo sigxile kakhulu kunguquko esikhona nxa kugcwatshwa umntwana ozelwe ethule izolo lalamuhla.
Kuvelile ukuthi imfa yomntwana oswelakeleyo ibingamenyezwa, ibitshelwa nje labo abaseduze besekuthi ogogo abadala babambe lowomsebenzi.
Ake sixoxeni ngomntwana obezalwa ephila ephelele besekuthi ngemva kwezinsuku esemhlabeni adlule. Lo, ubebekwa nje ngomgcwabo ojwayelekileyo.
Umehluko ubusiba sekutheni ubengabuthanelwa laye ngabantu abanengi, ubengcwatshwa kakhulu ngomama abadala kanye lezihlobo eziseduze. Ubuhlonitshwa kakhulu umngcwabo womntwana ngoba kulemikhuba ethile ebisenziwa ukuze ukufa lokhu kungabuyi kubize okunye ukufa lapha egumeni. Ngokunjalo abantwana bebeselatshelwa sibili ukuze bangalandeli omunye wabo.
Okunye njalo obekuvamile yikuthi isidumbu somntwana besingagcinwa isikhathi eside. Ubephanga angcwatshwe kusesemasinya. Lamuhla sekulenguquko enkulu esikhona ekungcwatsheni komntwana.
Abantu sebebuthana njenga nxa nje kubhubhe umuntu omdala. Lokhu sekusenza ukuba kwenziwe amalungiselelo omngcwabo omkhulu sengathi kugcwatshwa umuntu omdala.
Izolo umntwana ubengcwatshwa nje egoqelwe ngengubo zakhe ikanti lamuhla sekutshiyene usethengelwa ibhokisi angcwatshwe nje njengomuntu omdala.
Omunye umehluko osukhona yikuthi sekusiba lomthimba omkhulu njalo imfa yomntwana isingathatha amalanga amanengi kulindiwe. Kwesinye isikhathi uyezwa kuthiwa kulindwe isihlobo esivela emazweni akhatshana.
Okunye njalo, izolo umntwana ubelahlelwa eduze nje lalapho atshonele khona kodwa lamuhla usethwalwa asiwe ezindaweni ezikhatshana esiyabekwa.
Kwesinye isikhathi angabe ebhubhele edolobheni elithile kodwa isidumbu sakhe sithwalwe sisiwe ekhaya lapho umdeni lo odabuka khona. Bekungandanga lokho.
Mhlawumbe sekudalwa yikuhlangana kwemihlobo ethile osekusenza ukuthi amasiko lemikhuba kuxubane kucine nje kungasazakali ukuthi okuyikho okuyisintu sethu yikuphi. Okunye njalo isikhristu laso sesenze isiko leyiseka kakhulu.
Abantu basuka babone angathi ukulandela isiko labo yisono esikhulu kakhulu kanti ngitsho akunjalo phela umuntu ungumuntu nje ngesiko lakibo.
Imfundo layo isivoxe isiko abantu basala sebephambene bengasazi ukuthi isiko labo yiliphi. Kuhle ke bafundi sibelazi isiko lakithi ukuze siqhube kahle izinto ezithile empilweni. Asihlanganeni ngeviki ezayo sesikhangela umngcwabo womuntu omdala. Libe leviki elihle.
