uMthunywa
YiNtatheli kaMthunywa
ABADLALI benguqu abasakhulayo koBulawayo bazathi ukungena futhi enkundleni kumqhudelwano walonyaka owe-Fortune Fokoza Ncube Tournament oqhutshwa minyaka yonke Entumbane.
Amaqembu ayisitshiyagalombili azadibana mhlaka 1 kuMpandula kubangwa inkezo le eqoqwe yingcitshi yomdlalo eyadla ubhedu kuleli esingumqeqetshi eSouth Africa uFortune Ncube.
Kungxoxo abelayo loMthunywa, uNcube uthe kunxuswe wonke umntwana olethalenta elimangalisayo loba nje kuzadlala amaqembu ayisitshiya galombili enkundleni yeS’kwakweni Entumbane.
Amaqembu la abalisa iHighlanders, iChicken Inn, i-Alma eseHarare, iBulawayo Chiefs, iFMSA, iDulibadzimu ephuma eBeitbridge, iZebra Revolution leCity Rovers.
Kulumqhudelwano lo minyaka yonke kuvela ithalenta elitsha elisuka likhethwe ngamanye amaqembu aphezulu njalo abanye abantwana bahawukelwa ngezinye izikolo.
UNcube, ongomunye wabadlali abaphakemeyo kumbali yenguqu yakuleli, ubikele uMthunywa kuliviki ukuthi sekulindwe ukuyavuthisa inkundla zeS’kwakweni ngenyanga ezayo.
“Sesifikile isikhathi seFortune Fokoza Ncube Tournament. Imidlalo le iqhutshwa Entumbane, okulilokitshi engakhulela kulo njalo ngidlala khona inguqu. Kuzadlala amaqembu angu-8, wonke edlala ngokunxuswa. Sizakuba leHighlanders, FMSA, Dulibadzimu, Zebra Revolution,
City Rovers, Chicken Inn leBulawayo Chiefs.”
Uthe umbono wokuthi aqhube imidlalo le weza ngemva kokubona ukuthi ayisuye yedwa umdlali olethalenta owadabuka kulindawo.
“Ngananzelela ukuthi banengi abafana abasakhulayo abatshisekela ukudlalela amaqembu aphezulu, ikakhulu lawo akuPremier League. Lami ngisakhula ngangilesifiso esifanayo. Yikho kuqakathekile ukuthi sibuyele muva lapho esiphuma khona siphakamise abafana bethu ngokubenzela imidlalo enjengale.”
UNcube uthe uzanxusa izikhulu ezivela kwamanye amathimu kuleli ukuze zizibonele mathupha ithalenta eligcwele kuntsha. Uthe leli lithuba lokuthi abadlali abasacathulayo baveze ithalenta labo.
UNcube uthe njengoba imidlalo yakhe ihlose ukuphakamisa abadlali lokubaveza emphakathini, imvuzo yalonyaka izakhulunywa mhla wemidlalo.
