Trevor Mhlanga
Amacebo amahle ngempilo ulawo, iphupho lokuqansa ufike esiqongweni lisengqondweni yakho, lomfanekiso walokho ozabe usuyikho kusasa usemehlweni akho.
Bangaki abazi ngalumbono olawo, ubhaliwe yini phansi?
Ukhona ozwisisa ngala ovela khona lalapho ofisa ukuya khona ukuze akuqinise nxa usuphelelwa ngamandla, akukhuthaze nxa usulahla ithemba, njalo akunqande nxa usungena iganga?
Usebenzisani ukuzikhumbuza imihla lamalanga ngenjongo yempilo yakho lemigomo yakho yensuku ngensuku.
Amathuba afika emkhumbulweni wakho ulele, uhamba, uphathekile emsebenzini uyawakhumbula wonke na?
Abhalwe ngaphi? Okuhle okwenze izolo, amazwi enkuthazo owakhulumileyo, izenzo zokuphathisa abanye, khona kubhalwe ngaphi?
Inganekwane zakudala zikamvundla lonteletsha zenza lamanje kube lomkhumbulo osebantwini phose bonke ukuba umvundla yinyamazana ehlakaniphileyo.
Labantwana abancane abangakaze bawubone umvundla bazibiza ngawo nxa besemidlalweni yabo.
Indumela le ingenxa yokuthi lezindaba zika mvundla lonteletsha, azixoxwa kuphela, zabhalwa phansi.
Inhloso yakho njengendatshana kamvundla lonteletsha ungayibhala iba lezimo lezi ezimqoka.
Iba ngecacileyo, okuyikuthi kuyenzeka ube lento ojonge ukuyenza kodwa ingacacisanga ukuba ufuna ukuyenza njani, nini, njalo usebenzisa ziphi indlela?
Ikanti-ke ungazimisela ukuyibhala phansi imibuzo le uyaqala ukuyiphendula bese usiba lenjongo ecacileyo.
Okwesibili yikuthi iba ngekhumbulekayo.
Sokukanengi lapha abantu ababheja bembe phansi ukuba umnyaka ungakapheli bayabe sebeqoqe okuthile kumbe batshova bafika laphaya; kuthi umnyaka ungakafiki enkabeni bengasazi lokuthi bebekhangelele ukwenzani umnyaka uqalisa.
Uhlupho yikuthi imicabango yabo emihle njengembali ezikhula okhunjini lomfula ayilotshwanga.
Okukhathaza abanengi njenge qhubu elisebusweni yikubala. Uze wehluleke ukubala okubhalwe nguwe qho, hayi bo!
Nxa usulobe phansi okhangelele ukukwenza esikhathini thize, awuyi kukukhumbula ungathatha lolo gwalo olubhalileyo uluthukuze ngaphansi kombheda.
Chaya egcekeni umqondo osuwulobile, kube yinto yokuqala ukuyibona nxa uvuka leyokucina ukubona nxa ulala.
Kube yingxoxo yakho nxa uphozisa amaseko la ovakatshele khona, lebizo lakho abakusomisa ngalo osowenu.
Kawaziwe ngalokho olethemba lokukuthola, hatshi ngalokho okwesabayo.
Ingqondo njengebumba ingabunjwa ibe yilokhu okufisayo, okubonayo lokukhulumayo kucina kusiba yikho okwenzayo.
Lapha suqalile ukukwenza bhala phansi ohlangana lakho, indlela okuphatha ngakho, lezifundo ezingathathwa yilaba abafisa ukwenza njengayo.
Tshiya ugwalo olungasala lusetshenziswa ngabanye, kumbe umbukiso, kumbe inkulumo egcinakele emitshineni yakhona. Kakungafi lawe ukuthi wenzeni la emhlabeni usaphila.
Ziphendulele lo umbuzo; ukuthi izizukulwana zokhalo lwakho zazi iqiniso ngempilo yakho zizakwazi ngani? Kubhalwe ngaphi?
– Thintana loTrevor Mhlanga kunombolo zikamakhalekhukhwini ezithi: +263775523605. Kumbe kumakheli omqhafazo la: mhlanga.trevor@gmail.com; Facebook: Trevor Mhlanga; Twitter: @MhlangaTrev.