Isigqi somdladla. . . Woba ngumhlahlandlela hatshi umsitheli

03 May, 2018 - 10:05 0 Views

uMthunywa

Nxa ungaphindela emuva ukhangele indaba esike saxoxa ngayo elesihloko esithi: “Impi izala umnqobi” uzananzelela ukuba impilo siyifananise lohambo. Kuhambo lwempilo kulendlela zokuhambisa ezitshiyeneyo, omunye ugada inqola yenkomo ehamba kuhle kuhle ize ifike.

Omunye njalo ugada indizamtshina etheleka ngesiqubu emkhathini, indawo ezikude zibe sengazathi zisetsheku. Ekucineni bonke bayafika lapha abayakhona. Ibanga lohambo lilokutsho ngendlela yokuhambisa ekhethwayo, lemali efunakalayo ukusebenzisa leyondlela.

Kakho ongakhetha ukufuqwa ngebhara esazi ukuba umganga wohambo lwakhe ubanzi kakhulukazi udinga ibhasi. Lowo mganga ohanjwayo wazakala andukuba umuntu athathe uhambo lwakhe, okutsho ukuthi ilowo lalowo ophilayo uyazi ukuba uyangaphi ngempilo yakhe. Lokhu akuphumputhwa ngoba kakho ophefumulayo, olezithathayo kakuhle ongayaziyo injongo yempilo yakhe.

Ngiyazi ukuba sokube lemifanekiso yabantu thize engqondweni yakho owazi mhlophe ukuba baphila impilo mahlayana, mhlawumbe lawe uyake uzibuze kodwa ukhe phansi ukuba vele injongo yempilo yakho ngeyani?

Lokhu kwenziwa yikuthi awukafuni ukwamukela lokho okwaziyo njalo okusobala kuwe.

Injongo oyiphilelayo kayinzima ukwenza, kawudingi kuyidingisisa le lale, uyayazi, kodwa wesaba njalo awulaqiniso ukuba ungenelisa ukuyifeza. Nxa uzikhangele uzibona ungafanele, bese uzama ukucatsha ngomunwe ngokuthi awusazi isizatho sokubalelwa kwabaphilayo.

Okuthathekisayo yikuthi nxa usenza okungafanelanga luyatshaya uvalo, uhambe uthalaza sengazathi idolobho lonke liyazi ukuba wenzeni. Khonokho okukutshela lapho onxele khona yikho qho okukubonisa indlela efaneleyo.

Njengoba usunanzelele ukuba uyangaphi, manje yisikhathi sokuzibuza ukuba kudingakalani ukuba ufike khona. Lokhu kutsho ukucwayisisa ngendlela lendledlana zokuthola lokugcina inzuzo ukuze wenelise loba yini ofisa ukuyenza.

Ngiyazi ukuba indaba yenzuzo lithambo elingaqhobekiyo kunengi lethu, kodwa ikhona indlela ongayifunda yokwenza amatshe ancwebeke kuwe. Kwesinye sezigaba ezilandelayo kulesi Sigqi Somdladla sizagebha sitshone kumpawu zomuntu ongakhathazeki ngenzuzo.

Nxa sukulesi sidwabu yikho lapha olandela amanyathelo afana lawokulungiselela umhloliso esiwathinte kusidwabu esedlule ahlanganisela ukufunda kungwalo lakubantu abafaneleyo usizakale ekufinyeleleni lapho okhangelele khona.

Okukhangelele ngempilo lalokhu okwenzakala kuwe, yimpumalanga lentshonalanga. Uthi udinga indlela yokuhamba ngayo kuhambo lwempilo uzibone usungene wajula kugusu elimnyama khaca!

Nxa usendaweni enjalo kawulahlekanga ngitsho lakanci! Imfihlo yile; lanxa impilo iluhambo, indlela yang’khona kayilungiswa nguHulumende, umuntu lomuntu uyazicentela.

Kudinga ukuba ube ngumhlahlandlela, zidingele amathuba lemikhondo yokuqhubekela phambili, ungakhangeleli ukuthola umtshelelo ozahlala kuwo ucimeze bese uzibona usuphutshile, lokho ngeke kwenzakale, ungazikhotha ilihlo mpela.

Ukuba ngumhlahlandlela kutsho ukuba lelihlo elibanzi elibona indlela ezixukwini. Leyo ndlela osuyibonile yiyo-ke oyiphendlayo usebenzisa izikhali ezifaneleyo.

Izikhali lezi zihlanganisela ukwazi ukusebenzisa isikhathi lokungalahli ithemba lanxa ungela qiniso ngempumela yalokhu okwenzayo.

Ubunandi bempilo yikuthi kakho kwabahlatshwa zinsebe zelanga owazi kamhlophe ukuba ikusasa iphetheni, ngakho hlala ukhangelele ikusasa engcono evuma ukuba amalungiselelo osuwenzile asebenze.

Isikhathi sokulungiselela yisonesi, akula nsimbi ezatshaywa yokukwazisa ukuba yenza lokhu loba lokhuya, ikhanda elilamehlo liyazibonela.

Ingozi ongayenza yikuthi iganga ulithathe kuphela njengendawo yokucatsha (ukusithela) kuyo nxa usenza into ongafuni zibonwe nguzulu. Uhlupho lapha yikuthi lezozinto ozenzayo ulalowo mcabango kazikwakhi, kazikusi ndawo.

Lanxa itswaha lilomnyama ongawuthwala ngesaka uwuphanyeke ehlombe, ungaqali ukuba ngumsitheli osethole ithuba lokugila imikhuba ngendlela engaphathisi ukuphendla yokuyaphambili ngempilo.

Ukuba ngumsitheli lapha kutsho ukutomatoma njengesimungulu esilahlekileyo, uphitshekile kodwa kungacaci ukuba wenzani, njalo ubalekela inhlupho ohlangana lazo endaweni yokuba umelane lazo.

Umhlahlandlela kanjalo, yena kaphili ngamaqhinga kodwa ngamacebo ahlambulukileyo.

Nxa kulenguquko okumele uyenze empilweni yakho nansi; lahla ingqondo yezigilamkhuba. Woba ngumhlahlandlela, hatshi umsitheli!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds