Isigqi somdladla: Lasemfeni kuyadliwa

01 Mar, 2018 - 00:03 0 Views

uMthunywa

Impilo yemaphandleni inzima sibili, inyama kayiphong’ ukudliwa nje! Inkukhu ihlatshwa kungafika owemzini ovela kude, imbuzi ihlinzwa ngeKhisimusi, besekuthi inkomo iwiswe emthimbeni.

Nxa oFisani laboThamsanqa bengajimba lakho ayake akhukhuzwe amathambo, aze aphoselwe oXhaku laboNzonzo izinja ezichithisiweyo. Umuntu uyayikhanuka inyama aze afise ukuthi ngabe kuyafiwa koZibanibanyana ukuze azitholele ugazana.

SaMaqhinga ngumcabango bani wona lo? Kutsho inhliziyo! Kanti pho kuthiweni? Ibuye izibuze ongelampendulo njalo. Kuyisimanga lasemkhumbulweni kabani lobani ukuba izinyo livezwe lapho kukhala khona ingwevu lengwevukazi, kuyisiyaluyalu, omama sebethwele izisu lamantombazana esephethwe ngumhedehede, sezichinca ezokulahlekelwa ngumhlobo obeligugu.

Kubuhlungu ukufelwa, kuqeda is’thuli, uthola oSifelani amehlo esebomvu sekungathi aphandlwe yingotsha, kuyikusililo sodwa.

ONtombizodwa bona babonakala bethwele imikhono kusobala ukuba bahlulukelwe. Okungabantwana khona kuyasuswa ekhaya ngoba kungamelanga kubone inyembezi zabadala.

Lanxa kunjalo, emfeni kuyadliwa! Inengi vele lilanda khona ukudla, esililweni yikho lapha udlithi atholakala khona ukuze lalabo abasosizini badedise imimoya yabo. Kusempilweni, akulahlwa mbeleko ngokufelwa.

Kufanele njengomuntu ufunde ukwamukela lezo zinto ongeke uziguqule ezifana lokufelwa, ukuzalwa ugogekile, ubuyanga lokwehluleka kwayizolo, izigwenxa lempambaniso esezenzakeleyo kanye lokuzalwa emulini yezixhwali.

Lezi zinto kayisizo ezilawula impilo yakho njalo ngeke zivimbe impumelelo yakho. Ofelweyo kayisuye ofileyo, ngenxa yalokhu kubalulekile ukuba acande eyakhe indlela yokuqhubekela phambili ngempilo engalani lalowo osemtshiyile ngoba engasekho.

Oyisigoga kavalelwa yilutho ukufunda aphucuke, ukusebenza gadalala athole inzuzo, kumbe ukusebenzisa isipho asiphiwe nguThixo azizimazise ngaso elizweni.

Ubuyanga lokwehluleka kwayizolo kungabe kuyimbali yakho kodwa akulani lekusasa lakho, ikusasa ibunjwa yikwenza lokukhetha kwakho namhlanje. Nxa ungakhetha ukuchitha isikhathi uzisola njalo ukhala ngobuyanga lokwehluleka kwayizolo utshonisa ipiki emgodini wobunyama losizi.

Achithekileyo kawabutheki, ungalahlekelwa ngamathuba eguswini lako “ngabe ngenza lokhuya.”

Inkombalanga iveza ukuba imizuzu yokuzigiqa phansi ngenxa yezigwenxa lempambaniso esezenzakele kade yadliwa ngumangoye. Manje yisikhathi sokukhangela lapho ofuna ukuya khona unanzelele amanyathelo okumele uwathathe, ube usuqonda khona.

Loba kanjani uzafika kuphela. Inhlalo yokuzifanisa labangakini abehlulekayo empilweni kayisebenzi, ukuzalwa emulini yezixhwali, izikliwi lamahlongandlebe akutsho ukuba lawe unjalo. Wena ulengqondo ezicabangela yodwa engaboleki ebazalini iloba kwamanye amalunga emuli lowodwa umkhondo.

Okuhle ozimisele ukukwenza kungenqatshwe yingxabangxoza yempilo yezihlobo zakho lanxa kuyizihlobo zegazi. Amandla okuguqulwa kwendlela imuli yangakini ezakhangelwa ngayo kusasa asezandleni zakho, kuphela nxa ungakhetha ukutshaya indiva isimo abemuli yakho abakuso okwamanje uthi khoxo amehlo kulesi ofuna babeyiso kusasa ngenxa yesithunzi ozabe usuzizalele sona.

Yazi ukuba akula lutho olungaphandle kwakho olungakuvimba ukuba uphumelele. Inhlanyelo yakhona isengqondweni zakho, ihlakulelwa yizandla zakho, ivuthiswe zinyawo zakho.

Itholakala ekutheni amehlo akho abone ngangale kwenkathazo zalamhla. Impumelelo iyasetshenzelwa, ayibhudlukelwa kiyo njengamanzi ezifula zasendle. Lokhu kutsho ukuthi kumele ugeze izithukuthuku, ubophe inkalo usebenze.

Nxa kusitsho ukuvuka emathathakusa yenza njalo, qede usebenze sasiqgili, ilikitsho, isichaka, kumbe ubabhemi.

Nxa ungehlelwa yisiga esithile esithi singakuthi jeqe ubon’ amaphumel’ enyoka, kucatsh’ injabulo, ube yinyoni enethwe lizulu, kumbe inhlanzi etshelwe ngamanzi baze bathi “Sobohla Manyosi,” khumbula lokhu; lasemfeni kuyadliwa! Yeka ukukhala, mana uqine bese uqhubekela phambili!!!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds