Isigqi somdladla: Isidwabu setshumilanye: Thatha Izinqumo ezilukhuni

10 May, 2018 - 00:05 0 Views

uMthunywa

Silo Trevor Mhlanga

Ngempela ukuphumelela kutsho ukuthatha izinqumo ezifaneleyo lokuvuma lapho ophambanise khona. Nxa uthatha isinqumo ukhangela into ezinengi ezihlanganisela indlela umdeni ozakuthatha ngayo emva kokwenza isinqumo kumbe inzuzo yalesi sinqumo osithathayo.

Kubalula nxa izinqumo ozithathayo zijabulisa wena kanye labakini, kodwa siyafika isikhathi lapho okumele uzimele wena wedwa nje ungelani lokuthi isinqumo osithathayo siphatha njani abanye abantu.

Thina kusiko lethu lesintu sazi ukuba umntwana ulalela abazali kukho konke, abazali yibo abalolwazi ngokuthi kumele ukhule njani, udlale lobani, udleni, ugqokeni, ukhonze ngaphi, njalo ufunde ngaphi.

Ingqondo ebisengelwa lapha ngeyokwazi ukulaywa laloba ngubani ophezu kwakho, ukwenza izinto njengoba utshelwa, ungabuzi ukuba kwenzelwani kumbe uveze ubuqholo.

Kuhle lokho, kodwa kumele kufike isikhathi lapho ongabuzi komunye umuntu ukuba kumele wenzeni, sekumele uzibonele. Lokhu kubizwa kuthiwe yikukhula. Khona ukukhula akuyi ngomzimba kuphela, kuhlanganisela lengqondo eyazi ukukhetha.

Izinqumo-ke ziqakathekile ekuvezeni ukukhula kwengqondo, nxa usenza lezi zinqumo kumele wazi kuqala ukuba zikusa ngaphi andukuba uzibuze ukuthi abanye bathini ngazo? Into ozibona zikulungele kwesinye isikhathi zingaphambana lalokhu abemuli kumbe abangane abakubona kukufanele.

Esikhathini esinengi abantwana bayangena esikolweni sokuba ngodokotela, otitshala kumbe omongi ngenxa yokuba yiyo imisebenzi abayikhethelwe ngabakibo kumbe ngabazali.

Lanxa bengaqeqetsha kuleyo misebenzi bayenze ngobunono obukhulu, ngeke bafumana intokozo kuleyo misebenzi ngenxa yokuba akusi sifiso sabo. Umuntu onjalo uhlala ehlukulekezile ngaphakathi ehaqazwa yikubona labaya abenza lokhu qho akufisayo enhliziyweni yakhe sengathi bayajabula kulaye opika egqoke ezakhe.

Iqiniso kaliqedi bunini, ungesabi ukuzondwa bese uzithela phakathi kwento ongazimiselanga ukumelana layo ngenxa yokufuna ukuthokozisa abanye abantu. Abanye lamuhla basemitshadweni emunyu, emisebenzini esabugqili, kumabhizimusi abakhakhathayo ngoba behluleka ukumela iqiniso lokwala abangavumelani lakho.

Izinqumo ezinzima zingatsho ukuba okwesikhatshana abakini bayakutsaka emlonyeni, abangane bayakuhlamuka usale usubhununu nje.

Kodwa ungayimela into yakho uyiqhube uze uphumelele uzafika lapho wonke umuntu afisa ukubonakala elawe.

Imbali yalaba abaphumelelayo itshatekwe phezu kwezinqumo abazenzayo kwamangalisa ngitsho labomkabo, kweleNgiLandi (England) uRowan Atkinson waliwa ngumkakhe ngoba ethi uphambene ingqondo kodwa namhla umhlaba wonke uyamthanda uMr Bean.

EMelika (America) uSteve Jobs waxotshwa kunkampani yakhe ayeyiqalile i-Apple ngenxa yezinqumo ayezithatha kodwa wacina esebuyiselwe waba lenkunzi yokuphumelela okwabhaha umhlaba wonke.

Izibonelo ngeke uziqede kwelakithi lapha lakwamanye amazwe zindaba ezimtoti zodwa ezithi ungazilonda unyukubalise ubuso.

Okuhambelanayo kulezi zindaba yikuthi laba bantu kabanakanga ukuba abanye bazakuthini ngezinqumo zabo, kodwa benza lokhu abazi kufanele.

Bambisisa lokhu, ungaqali ukweqela isinqumo esingafanelanga ngenxa yokufuna ukwehluka labanye abantu qha. Nxa ulombono omahluko osobala kuwe ukuba uyasebenza, lanxa abanye bengakuboni wenze.

Wenze kahle baze banqekuze bevumelana lawe, bakutshayele ihlombe baze bakusize ukuba uwukhulise ube yinto yokuphangwa nguzulu wonke. Nxa ufuna ukwehluleka, zama ukuthokozisa wonke umuntu, lapha ungazikhotha ilihlo impela.

Ehanjweni lwempilo kumele uke uthi khwimilili uzimele wedwa laphaya, hatshi ngoba uzenza ngcono kulabanye kodwa ngoba kawufani labanye, lokho abakukhangelele kuwe sokungenzeka kungabi yilokho okufunayo njalo okumele ukwenze.

Sithathe leso sinqumo esikhulu esilukhuni, wenze umahluko kweyakh’ impilo!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds