uMthunywa
Silo Trevor Mhlanga
Sokuncan’ indawo kwaZidibene, amadoda ayaginqa, kuthunq’ uthuli, amakhanda ababukeli ayabalandela lokhu enyemukula eqonda le abuyele njalo aye ngale.
Kuyadutshuzwana, kukhal’ inqindi, kanti vele kubangwani? USimbelekecane nguye oqale lindaba, ubuthelele amadundulu enhlabathi aba mabili, wasesithi kuMzondisi lakuMzondi “leli libele likanyoko, leliya ngelika nina,” akhathswa amadundulu zasukelana ezingo nkalakatha.
Ubunyamazana bomuntu bonke buvela obala nxa ungathinta unina, ngitsho lamadoda amadala ayaswela ukuzibamba ungadlala kubi ngabonina. Akulanhlamba ecunulayo ukwedlula ezithi . . . kuthi kukanyoko, lapha-ke uhle uzwe inwele zisukuma, ikhanda libhoda legazi selinuka emakhaleni, kufana xathu lokuthintisa usungulo kunhlamvu zamehlo.
Nanguya useqonda esibayeni, uyabutha ubulongwe obumanzi ukuze asinde ixhiba labafana, esuka khona, nguye lowaya esesiyadinga isidaka esibomvu, esimnyama lesimhlophe ukuze aligudule kube kuhle kube njeya. Umceciso wakhona ngamatshe aligugu athethwe emfuleni. Ayisibuhle lobu, ikhaya lonke lizimaziswa nguye lo umama.
Nsuku zonke ekuseni idolo litshaya phansi ukuphemba umlilo, kulungiswe ukudla, kuphithizelwe, kuthi ngokuqhwayiza kweso yonke into ibesendaweni yayo ukuze kubanjwe eminye imisebenzi. Kuyabe kuyim’hlolo atshi isikolo ukuba umama aqede usuku lonke lingatshayanga phansi idolo ukuze enzele imuli yakhe lokhu kumbe lokhuya. Loludonga lwemisebenzi kamama lufuqwa luthando alalo kubantwabakhe lenhlonipho alayo kumkakhe.
Indlela abaphathwa ngayo ngekhaya yenza bazimisele ukubafela onina, kuthi lanxa esazi uMzondi ukuba uMzondisi uzikhabele idundulu lenhlabathi yonale ayinyathela nsuku zonke, khonokho ukuthi lelo dundulu lifanekiswe lebele likanina kwanele ukumcunula. Impi enkulu kayisi yokuzwana amandla kodwa ngeyokuveza ukuqakatheka kukamama lokufanela kwakhe ukuhlonitshwa. Wonke umuntu uyakudinga ukwaziswa, ukuphiwa isithunzi, lokukhukhunyezwa.
Lanxa uyisipantsha, uyisifundiswa, uligabazi, uyinduna, loba uyini kumbe wenzeni okuhle empilweni akusizi lutho uba abantu bengakuboni konke lokhu. Isithunzi sivela kundlela obonwa ngayo ngabanye abantu.
Kumama ngekhaya, impilo yakhe iphelele nxa imuli inanzelela njalo ithakazelela umsebenzi awenzayo.
Kubuhlungu ukuzwa kuthiwa umntanakho loka sibani banyana baphose baginyana bephila, kodwa amaphaphu ayabe edlala lenhliziyo ngokuzwa nje ukuthi bekubangwa wena mama.
Idolo liyabhadala sibili, khonokho ochitha isikhathi ukukho kungumntwana omkhulisayo ozathi kungekudala akuvuse. Kuyimuli oyinanzayo ezakuba lawe lanxa ususebunzimeni, nxa uchitha isikhathi ezeni yikho lokho okuzakuba ngumvuzo wakho masinyazana.
Umholo wakho kungenzeka kungabi yimali njengo mama ohola ukuqakiswa ngabantwabakhe layimuli, kodwa okucacayo yikuthi lowo mholo ulesisindo ukwedlula imali.
Idolo limele amandla akho angaba ngawengqondo kumbe awezenzo, lapha owachitha khona yikho lapho ofumana khona inhlawulo yakho. Nxa usebenza umsebenzi thile kodwa ingqondo icabanga ngokunye, sokungenzeka uwuphutshe lowo msebenzi, kodwa usazi mhlophe ukuba ubungenza ngcono.
Ngezinye indlela ukufaka idolo phansi kutsho ukugxila kwengqondo lamandla ngitsho lenhliziyo kulokhu okwenzayo ukuze kuvuthwe ngendlela ephakemeyo lepheleleyo.
Umama nxa esemendweni kakho ebantwini bakibo, lesibongo sabantwana kumbe umkakhe abanakanelayo akusi sakhe kodwa lokhu akumvimbi ukuba enze umsebenzi wakhe ngothando, ngoba uhle abe yingxenye yaleyo muli. Kanenginengi okwenza ungafaki amandla akho onke kumsebenzi owenzayo yikuthi uthi kayisiwo wakho, lemali oyiholayo iyingcosana. Zwana-ke lapha, ungazifundisa ukusebenza uyekethekisa vele kawuyi kuguquka lanxa sokungokwakho, futhi amathuba okuba uzitholele lawe okwakho aza kuphela nxa uqakathekise okwabanye ukuphatha sengazathi ngokwakho.
Ngakho ungekeli ukuhlonipha abakuqhatshileyo ubenzele kahle emsebenzini. Sungabona amandla akho kungathi ngameva esondweni lwendlovu, ungazikhathazi ngalokho ngoba kuyinhlanyelo yoxakuxaku ethula ithi zwi iminyaka leminyaka kodwa mzwana yamilayo ikhula njalonjalo ngesidensi, iqholozelela umkhathi, ithela lanxa phansi kome qha! Funda kumama, idolo kalidanisi!
*Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
