uMthunywa
Trevor Mhlanga
NGISALUKHUMBULA loluya suku sengazathi kuyizolo; sasihlezi kuleya ndlu ethengisa izilololo, silalele imbongi zigiya, amabala ececiswa, aconjwe, akhukhunyezwe, akhanzingwe aze anindwe uluju. Kukhale izandla, kudlele labazidlulelayo, amakhanda anyikinyeke aze abalekelwe zinwele, kugobhoze amathe aze aqede ukoma.
Nxa imbongi zihaya ngesingisi kungathi saqalwa yizo, nxa zingathi ziza ngesakithi uyalibala ukuthi yiwo lawaya mabala owakhuluma mihla yonke, kuphenduka kube ngumklavava wento ekhwabithisa umzimba wonke.
Ezinye imbongi ngezihlanganisa indimi ezimbili kumbe ezintathu lezedlula lapho kwelukane kube kuhle kule goda, kungezwakali ukuthi olunye ulimi luqala ngaphi lolunye lucina ngaphi, kuhlabuse. Nangu uFarirai “The Golgotha Poet” usengenile esitikini, kuhle kuvungame inkundla yonke engakakhamisi, abeseyibetha ethi: Nga ngingangengungu!
Inkundla yaduma mzwalakho, umdumo okhithiza umuhlwa, uwohlokise amaluba, eyizunguza indaba yengungu engenayo kuyo yonke inothongwana. Ungakucubungula, lawe uyakubona ukuthi ezinye indawo abantu abatholakala kuzo zitsho okuthile ngabo. Isithanda bunandi sitholakala endaweni zokuzijabulisa, igqwetha litholakala emthethwa ndaba.
Kwabanye ibala lokuthi “mthethwa ndaba” libenza babe ngumhlanga, baginqe babe manzi te! Abanjalo balendawo zabo ezibakhululayo lapho abenza inyakanyaka yonke abayithandayo. Angazi ukuba yiphi indawo otholakala kuyo?
Ukungena endaweni ethile esikutshoyo lapha akusi kuvakatsha kumbe ukuphelekezela abanye, kodwa ukwazakala ngaleyo ndawo. Uya uzwe nxa umuntu edinga othile angamazisisiyo kubuzwa kakhulu ukuba lowo muntu amdingayo ngowangaphi, nxa esetshilo besekusiba lula ukuba asizakale. Okufika egqondweni walo osiza odingayo yizenzo, kumbe indawo lowo muntu odingwayo azakala ngakho. Bekungathiwani nxa kudingwa wena? Ndawo bani owaziwa ngazo?
Kambe lezo ndawo zikuveza njengomuntu onjani emphakathini lakuThixo? Uyazibonela lawe ukuthi indawo ingakunqunula kumbe ikuzimazise? Kunkodlo “Nga ngingangengungu” kwakuvezwa ingungu njengeyinye yezitsha zokusebenzisa endaweni zokuzikhipha isizungu.
Lapha abadala labatsha abalahla ubuyibo babo bangene emumweni wokuzitika ngentokozo, kodwa kuba ngokwesikhatshanyana nje.
Uhlupho ngento ezinengi zesikhatshanyana yikuthi zitshiya amanxeba angapheliyo. Khangela ibizo lakho lingadunyazwa ngendawo ongena kuyo okwesikhatshanyana esingatsho lutho, usale usuzimvemve ngenxa yemizuzwanyana embalwa.
Kudinga ukuthi lawe uke uzithibe kokunye, ubambe inhliziyo elengayo ukuze ulondoloze ubuntu bakho. Icabangisise lindaba, ukuze ube lesithunzi ebantwini kungathatha iminyaka yokwenza kuhle, kodwa ukuba leso sithunzi sikulahlekele kungathatha umzuzu owodwa zwi!
Nansi indlela elula yokunqoba isilingo sokulandela inhliziyo elengayo, nxa ukhangele indawo ekuhugayo zibuze ukuba ungafisa na ukwaziwa ngaleyo ndawo na? Nxa impendulo kungu hatshi, wothi enhliziyweni; “. . . bengiyangena; nga ngingangengungu!”
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
