uMthunywa
Trevor Mhlanga
NXA kulezinto ezisetshenziswa kakhulu ukulungisa izivuno, yilezi zombili; kuthi nxa sekulungisiwe besekukhohlakala ngazo.
Akumangalisi ukuthola izitsha lezi zombili zingageziswanga, kakuvamanga ukukhumbula ngazo nxa suqedile ukuzisebenzisa, uze uzikhumbule njalo sokungomunye umsebenzi.
Nxa amabele ingabe amazambane ephakathi kwengiga, ehlangabezana lomgigo, kusobala kuwo ukuba ukuhlukuluzeka kwawo kuvela kulezi zitsha, kukanti sikhona isandla esiyiso esiphosa umgigo.
Nxa umuntu ephakathi kwesikhathi esinzima isintu sithi uphakathi komgigo lengiga, kakukhulunywa lutho ngesandla esisebenzisa lezo zitsha.
Kunjalo-ke lasempilweni, abanye baphila impilo yokusetshenziswa ngabanye ukudlisa abanye imbuya ngoluthi kodwa bengasoze bathole lutho ekusetshenzisweni kwabo, kukanti labo ababasebenzisayo kabetheswa cala.
Kuthathu esingakunanzelela nxa kugigwa; okokuqala, kungena kuphela okungalunganga okudinga ukulungisiswa.
Okuyikuthi nxa izinto zizinhle kawaziwa, emadilini kawubizwa kumbe nxa kufika abantu abaqakathekileyo awukhunjulwa kodwa nxa sekuxatshanwa kuqalwa kudingwe wena. Ube ngulowaya ubabakazi othenjiweyo ngenkulumo enxele, otshela umuntu zigcwale, uyangise umuntu asale eze lanxa egqoke ezibizayo.
Ungazibona unjalo, kumbe ungulowaya muntu odingwa nxa sekugoqwa ingqindi, sokukhulunywa ngamazwi azwakala phetsheya kolwandle, zazele wedwa ukuba uyisitsha sabanye sokugiga.
Ungaziqhenya uthi bakuthembile ukuthi uyabachumisa abantu ubafake endaweni zabo ngenkulumo kumbe ngokulwa, kodwa zibuze ukuba kungani bengakudingi nxa kukuhle njengoba bekuthembile?
Okwesibili yilokhu; konke okuphambaniseka ngesikhathi kusagigwa kugconwa izitsha, hatshi ogigayo. Yena lowaya muntu osetshenziswa ukulumathisa umlilo wengxabano nguye futhi othiwa mubi nxa into sezonakele ngamandla.
Kwesinye isikhathi laba abaxabanayo bayabuyisana besebesenza sengazathi umsunguli wenhlupho zabo nguyena lowaya “olomlomo ongahlalwa mpukane”.
Kuyakuphambanisa-ke lokho kuhambo lwempilo nxa kunguwe osuphoselwe inyoka ephilayo ngoba usuthwele imithwalo engesi yakho. Okuyingozi kakhulu lapha-ke yikuthi inzondano iyazalwa phakathi kwemuli, kumbe abangane, ngenxa yento encinyane engasabanjwanga ngendlela, abantu badlane baze baqedane.
Okwesithathu nanku; kuthi nxa sokugigiwe kwaphutsha osekulungisiwe kuyabekwa ezitsheni ezingcono ezifanele ukugcina ukudla.
Akucabange, susebenzile wehlisa izithukuthuku, kuthi lapho sokumele uhole iholo lakho liphiwe omunye ongasebenzanga.
Lapha-ke yikho okuvela sobala njengamadolo embuzi ukuba lumsebenzi obuwenziswa awusi wabantu kuzwa.
Abayibo abathaphuza impumela yokutshikatshika kwakho kababonakali lakanye nxa usagigana labantu uzibonakalisa, kukanti eqinisweni uyazeyisisa. Kakho othi engasebenzisa isidwaba ukuhlamba indlu esesula ingcekeza abesesichaya ebandla, siyafihlwa. Qaphela lokhu, ungazibona utshiywa eceleni njengomlahl’ abantu phakathi kwezinye inkuni, wena kunguwe obuginqiswa izolo, uyisidwaba sokwesula ingcekeza. Ungavumi ukusetshenziswa usenziwa umgigo lengiga!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
