uMthunywa
Trevor Mhlanga
Akumangalisi yini na ukuba inkokheli zezigila mkhuba, ingcitshi, akusinswelaboya abacathamel’ abantu ebusuku?
Indoda ezihloniphekayo ezaziwa ngezembatho ezicwebezelayo, ezihlala phansi zikhande imithetho yizo qho eziyizigangi zokucina! INkosi yethu uJesu Khristu njengomuntu owayesaziwa ngokufundisa ngomthetho langenhlalo kwakuqotshwe ukuba laye agile imikhuba.
Lwalukhula mihla yonke udumo lwakhe ngenxa yezenzo eziyizimanga ayezenza esehlala elandelwa ngamaxuku; kwakubaqedelu umzimba lokhu.
AmaFarisi lamaSajusi babevele bedinga umnkenke abangangena ngawo ukuze bambeke endaweni yakhe.
Kungansuku zatshwala nangu uJesu ezitshisa ngawakhe; gxavu gxavu ngezandla ezingcolileyo.
Emini libalele, elakho liyatshona, ngoba ungeke waba lamandla okuguqula yonke into ikuhambele ngendlela ofisa ngayo. Ungathithibala, utshe amathe, ngeke wabona intuba esemehlweni akho.
UJesu labafundi bakhe emva kokuntula lelizwe kufundiswa njalo kusiliswa abantu, latshona elabafundi.
Amandla okuqhubekela phambili ayengasekho lamehlo esebona inkanyezi.
Behluleka lokubona impendulo yohlupho lwabo eyayiphambi kwabo, sebehinekile ngephango. Yikho lapho uJesu athatha khona inyathelo, zikhangele ingwevu zamaFarisi lamaSajusi, elandelwa ngabafundi bakhe bayiqonda insimu yomuntu bazisiza ngamaqabunga aleyonsimu.
Nxa singalamba sidla utshani. Ukuziqhenya ngokuthi ubuthanathana ngezake ukwenze, ngokwabantu abaphansi, akusebenzi nxa usungene phakathi komumo. Abafundi kabazange bacabange ngomthetho wamaJuda ababephila ngawo sonke lesi sikhathi, ngalolo suku, bangenela amaqabunga bengagezanga lezandla.
Akuqali ngawe ukuthi ukhohlwe ngokunengi okuqakathekileyo ngenxa yokuba susengozini. Ingqondo isuka icabange ngokuzikhupha kuleyongozi kungelani lokuthi kusetshenziswa ndlela bani.
AmaFarisi lamaSajusi bathola ithuba lokugcona uJesu ngoba evumele abafundi bakhe ukuba badle ngezandla ezingcolileyo. Okwenzayo ukuba usinde engozini lakho kungenza abathile bakuninde ngodaka ube ngosolekayo emphakathini.
Isela libamba ngcono amanye, wena oliqili nguwe onanzelela ubuqili babanye, amaFarisi lamaSajusi bakubona kalula ukuphambanisa kukaJesu ngoba bevele bephila impilo ephambeneyo.
Okuhle yikuthi kwakuvele kungela cala lapha, uJesu wabatshiya sebezinyoni ezinethwe ngamanzi.
Okungevikwe yikuthi, izikhathi ezingejwayekelanga zidinga ukuba wenze okungejwayekelanga.
Ukudla ngezandla ezingcolileyo kuveza ukuba kwakungayi kusiza kubafundi ukuntula bedinga amanzi okuhlamba izandla ngapha indlala isibathene amadolo.
Ngendlela efanayo, yazi okuyisiqokoqela empilweni ongakhohlwa konke ngenxa yakho. Isihlahla lapho impilo yakho ethembele khona ngeke wasekela sisitsha, wenza konke ongakwenza ungelani lokuthi uzembula izembatho ebandla loba ukuthi ngubani ovusa inkophe.
Nxa sokusonakala ungabi lenhloni ulunge njengo malukazana oqala ukufika kwabozala, lawe thatha inyathelo uthi gxavu gxavu ngezandla ezingcolileyo!!!
Thintana loTrevor Mhlanga kunombolo zikamakhal’ ekhukhwini ezithi: +263775523605. Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
