uMthunywa
Trevor Mhlanga
Kusendlini yokufundela, umqeqetshisi uletha umhloliso ohlobisa igazi, kome izandla, ajuluke amaginqo lenzipho ziphembe indlela ekhanda. Ngumbuzo owodwa zwi, othwele imiklomelo engamatshumi amahlanu.
Ngempela okunje akuzange kwenzeke! Umbuzo obuzwe kulumhloliso ngowokuthi abafundi badwebe inunu.
Okunzima kulumhloliso yikuthi bonke bakhangelelwe ukuphuma lomfanekiso munye.
Akucabange ukuthi owenza inqola yakuqala wayekuzwe ngobani lokho, ekubone ngaphi, wakufundiswa ngubani? Umbalisi owaqeqetshisa umuntu owaloba ugwalo lwakuqala nguwuphi? Imicabango yonke le yavela ngaphi?
Ngumbuzo ofanayo njalo kuzikhali zakuqala ezenziwayo, abazenzayo bakutshelwa ngubani ukuba zenziwa njani njalo zisebenza njani? Bekwenza konke lokhu babejongeni? Impendulo kumibuzo yonke le yikuthi ingqondo ayilamikhawulo, ingacabanga iphutshise okungakaze kwenzeke kumbe kubonakale.
Kungaba kuhle kwakhe isigaba kumbe kube kubi kubhidlize izwe okuphuma engqondweni yakho kusiya ngokuthi ukhethe ukuba impilo yakho ilandele yiphi indlela.
Yizikhwica zokudweba zodwa ezikulo umhloliso, kodwa lo lalo ulowakhe umbono wokuthi inunu ikhangeleka njani. Bekungaba lula nga batshelwe ukuba badwebe indlovu, loba eyinye nje yezinyamazana, kodwa ngubani ongazi ukuba inunu injani?
Wonke umuntu sowake wezwa ngenunu, mhlawumbe wayibona emkhumbulweni wakhe waze wacatsha ngaphansi kombheda eyibalekela, kodwa kakho ongayidweba ephepheni athi “nansi inunu.”
Lawe uyafikelwa yikwesaba uze wehlulekiswe yinto ongakaze uyibone futhi ongayaziyo. Ukungena komqhafazo, omabonakude, lempucuko yakulezinsuku kuyinunu ebadaleni.
Akwamukeleki ukuba injetshane zibonakale zithwele okuyizigxinginyana okuncinyane, kuzihlokohlokoza besekuhleka kodwa sanhlanya ezidobhe okudliwayo.
Eyakho inunu mhlawumbe yikuguqula indlela owenza ngayo izinto, ukuzama ukuqala ulutho olutsha kumbe ukuphutshisa lokho okuqalileyo.
Nxa impilo yakho ikhethe indlela yokuphelela endleleni kukho konke okwenzayo ingqondo yakho iyakwamukela khonokho bese usiba ligabazi lokwehluleka.
Umahluko phakathi kwabantu abaphumelela ekwenzeni okuhle, labaphumelela ekwenzeni okubi ngamanyathelo akuqala ekusengeleni imicabango yakhe.
Laba abenza imitshina, izinqola lokunenginengi okuhle bafuqwa yikuthwala nzima thize empilweni lasemisebenzini yabo. Kwasekusisa kibo ukuba kungaba lendlela yokwenza umsebenzi ubelula lempumela ibe ngcono, basebephuma lalawo macebo okulungisa abakulungisayo.
Abenza izikhali zempi lemijibila yokulimaza abanye bahlangana lobunzima thize labo empilweni yabo, babona kusiza ukuhlukuluza lokubulala ukuze into zibahambele basebephuma lazo izikhali abazenzayo.
Kukanti esikufunda kulamaqula amabili yikuthi nxa usahlalisekile ngendlela ophila ngayo kawuphumi lalutho olutsha. Ikanti-ke, nxa ungazimisela ukwenza ulutho uyalwenza, kungelani lokuthi alukaze lubonakale.
Nxa ungathembi ukuthi uzaphumelela yikungathembi kwakho okuyinunu eyenza uphelele lapho oqale khona. Kulokhu bamba ukuthi, nxa inunu kuyinto ekhona; idwebe eyakho inunu sibone!
Thintana loTrevor Mhlanga kunombolo lezi: +263 775 523 605. Kumakheli omqhafazo lawa: [email protected] facebook: Trevor Mhlanga; Twitter: @MhlangaTrev
