Isigqi somdladla. . . Isidwaba setshumi lane: Kuyingozi ukudla ingcuba

31 May, 2018 - 00:05 0 Views

uMthunywa

Silo Trevor Mhlanga

IMALI seyathatha indawo yamasimu emadolobheni, impuphu lakho konke okulinywayo sokuthengwa. Kakho olesikhathi sokuchitha ethwalana lamakhuba esiyahlakula khona kulemali angayithola ngokubambabamba abesethenga loba yini ayifunayo.

Imali yenza labangafuyanga bayidle inyama baze bedlule labafuyileyo beyithenga phose nsuku zonke.

Indawo zokuthengisa okudliwayo ziya zithuthuka ngamandla, lendawo zokubulala inyamazana sezitholakala mingcele yonke. Ngenxa yokuthi ukudla okutshiyeneyo sokuthathwa njengendlela yokuthola inzuzo indlela osekuphathwa ngayo kayisafani. Sokugijinyiswa ukuthengisa okunengi kutholakale imali, okubangela ukuthi okunye okumele kunanzelelwe kukhohlakale, njengokuhlanzeka kwendawo lapho okwenziwa khona, kumbe okuthengiswa khona, lokuthi lokho kudla akubi yingozi ebantwini.

Lokhu sokwenze ukuba kube lohlangothi kukhansili olukhangela ngakho ukuhlanzeka lokuthi lokho kudla okuthengiswayo kungabe kufanele abantu na. Indaba enkulu yikuthi nxa kungasananzelelwangwa lokhu kungonakala impela. Lawe ungajaha ingqubekela phambili lempumelelo ungananzanga okunye okumqoka ucina usegodini.

Inhlanyelo yokwehluleka yikulibala ukunanza abanye abantu nxa usembizeni yokuzingconoza empilweni.

Lokho akutsho ukuba sokumele uchithe amathuba lemali uzama ukuthokozisa abantu bonke othintana labo kodwa, njengomuntu onanzayo ukuhlanzeka kwalapha athengisela khona ukudla kwakhe, kumele unanze amagama owasebenzisayo ekukhulumisaneni labanye abantu lanxa kungathi baphansi kulawe.

Umlomo wakho kumele uhlale ukhipha amazwi apholileyo atshiya olaleleyo ezizwa engumuntu, othi nxa kuyikuthi ukuphambanisile asale ezisola njalo ekubuke ngendlela omphathe ngayo angayifanele. Lokhu kwenza impilo yakho ihlanzeke ingasoleki, kuthi labakhonona ngawe bakuswelele isici emazwini owakhulumayo. Amazwi akho kawangabi ngathukayo, aziqakisayo, kumbe ajonge ukuyangisa abanye, ngoba amazwi anjalo ayingozi lakubani, ngeke akutshiye umomotheka engatshiwo kuwe.

Iziphamandla, labomaqhuzu bekusasa engcono empilweni yakho yibonalabo bantu ohlangana labo, lokho abakutshoyo ngawe ngendlela obaphathe ngayo kungaba yizithuko kumbe yiziqalekiso, kodwa nxa wenzile eyakho ingxenye uqhubekela phambili inhliziyo emhlophe.

Lo osebenza lapha okubulawa khona inkomo kugijinyiswa imali zwi, kulula ukuba inyama im’phume.

Kwesinye isikhathi uyathi eseyikhangele emganwini, indlela ebulewe ngayo im’vakatshele ekhanda, aqale ukuyibona inkabi endala ikhonya, ibongolela isibhekane lokufa, alibone legazi limpompoza, inkalakatha yenyamazana iwela phansi iqhatsha. Umsindo womtshina uqale ukuduma njalo njalo sokuqunywa amathambo, acabange ngokuthi ingabe ife isizwa njani ngalokhu osekwenzakala kuyo? Mhlawumbe ike yathalaza enhlangothini zonke yaswela isiphephelo, kambe ubuhlungu ebuzwileyo benza inyama idleke na?

Umoya uyatshona ngemicabango enje, inhliziyo inyampe, kuthi athathe leyo nyama ayiphosele izinja! Athi uyathalaza, abone abanye beyidlithiza baze bagxoze indenda, azwe ebazwela ahleke engahleki, inhliziyo isithi nga bayazi, ubuso buze bunyukubale ngoba esazi lokuthi kwesinye isikhathi ba bayithenge iyigcuba emsebenzini, besebeyihlahlela ngehloka, bayisikasike ngemtshina kungaziwa muntu okwenzakeleyo.

Ingozi ngengcuba yikuthi esikhathini esinengi ingabe ibulelwe ngumkhuhlane thize ongacina usiba yingozi kwabazayidla. Ububi ngalokho yikuthi emabhutsha akwaze kwaziwa ukuba linyama iyisimo esinje, futhi esikhathini esinengi abakhathali ngakho lokho ngoba labo begijimisa imali, ocina esengozini ngozayidla.

Ukuzikhathalela wena wedwa ungenani lokuthi abanye abantu emulini kumbe esigabeni bazuzani kulokhu okwenzayo kufana xathu lokuthengisa ingcuba. Sokungenzeka ukuba emehlweni akho uzibone usiya phambili, impilo yakho isiba ngcono, uphumelela kodwa hamba juba bazakucutha phambili. Yenza kuhle, thola inzuzo efaneleyo lehlambulukileyo, Phumelela ngendlela eyamkelekayo. Abakuzondayo bangakuzonda, bakuhlebe, banqume besuka eNingizimu baze bayebamba iNyakatho ngawe, kodwa kakungabi ngenxa yokuthi kawenzi kuhle, kawulankulumo ezifanelanga, kumbe inotho yakho iza ngendlela ezingalunganga.

Ungathengisi ingcuba, ngoba kuyingozi ukudla ingcuba!!!

Thintana lo Trevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds