uMthunywa
Silo Trevor Mhlanga
EKUSENI indonsakusa isankanyazela esibhakabhakeni, uyazama ukuvuka uzwe umzimba usala, usathi uyathi khwatshu uzibone suthe vutshalala, uze uthi emva kokusadalala, uzithole inyawo zakho.
Amehlo lokhu ethe ziba; kuzinkanyezi zodwa, ingubo sezilaxazelwe le! Ikhanda lithi ukukukhakhatha kungathi ungahlanya, lesibane sikagetsi sokungani sikuhlokoza emehlweni.
Yikusa koMvulo lokhu, abadala abawutha ibizo bathi nguMvulo obomvu ngoba ubuhlungu njengokutshokoza kwegazi esilondeni. Kusobala okwenza kutshiwo njalo ngoba kulapho inengi elilwisana lomkhumbulo wokuphela kwempelaviki lokuqala komsebenzi.
Akulula ukubamba isikhathi sokuy’ emlindini ophanda kuwo, abanye baze baqale ngokugqoka izembatho zokuy’ emsebenzini bengakagezi. Bese uthi mehlo suka ubone ukuba ingubo zilokhu zilidudu zilindele ukwedlulwa.
Nansi isinqumo sakuqala sosuku; kungenzeka ukuba kungabi lamuntu ozangena ekamelweni lakho lize litshone, kakho mhlawumbe ozakwazi ukuba kawendlulanga nxa usuzihambela ezitaladeni ugqoke okuhuga amehlo, kodwa kumele usithathe leso sinqumo.
Inguquko yempilo yakho yakhiwa ngezinqumo ezenziwa nsitha, ungakhetha ukungendluli umbheda, umhlaba mhlawumbe ngeke wazi, kodwa wena manqamu uyabe usuzifake endleleni yezehluleki. Abantu abaqala izinto bangaqedi, ngamavila lamatshapha.
Lanxa ungahlonipheka kanganani lapho osebenza khona inhliziyo iyabe isazi ukuba awusimuntu olempumela ngoba usehlulwa ngezakho ingubo olele kuzo.
Ungajwayela ukuba izinto ezincinyane njengokulungisa umbheda ziyatshaywa indiva akumangalisi ukuzibona sukhohliwe ngemithwalo emikhulu.
Indlela ozihlonipha ngayo nsitha iqakathekile ngezinga elifanayo njengokuziphatha kwakho kuMthwakazi.
Ungenza kuhle ngosuku olulodwa entweni ezincane kukunika ulokoloko lokuphinda wenze kuhle, uphinde njalo, uphinde njalo, njalonjalo.
Ukuthatha izinqumo ngumsebenzi wemihla ngemihla; lanxa uzendlule kakuhle kanganani ingubo izolo, lamuhla ulomthwalo wokuzendlula njalo, vele umbheda uyabheda!
Umlobi wenkuthazo uSean Emmanuel Nota kugwalo lwakhe oluthi I Am Young, Rich and Successful olusanda kudindwa ukhuluma kabanzi ngohlonzi lwezinqumo okumelwe zithathwe.
UNota uthi yena isenzo sokunquma seyeme kumqondo osisusa sawo sisekujuleni komcabango womuntu.
Okwakha izinqumo ozithathayo yinkambo obelayo lemibono oyiphiweyo. Okugcizelelwa nguNota yikuba akusinqumo singafunzelwa yilutho, ngenxa yalokho kumele umuntu azwisise okuyikho okusengela umcabango wokuba enze izinqumo azenzayo.
Ugwalo lukaNota luvumbulula okufunza izinqumo, lwabe indlela zobungcwethi zokunquma ukuze lutshotshozele ingqubekela phambili lokuphumelela okugxilayo empilweni yakho.
Umbhedo wombheda usekutheni awunanzi ukuba uzwanjani, ukhathele okunganani loba usutshiywe yisikhathi kanganani, uqhubeka ukuthe nhlo ulinde ukulungiswa!
Ingubo kazinyikinyeki lakanci zingathintwanga! Ngumsebenzi lo ongetshiyelwe omunye umuntu, lanxa useyiseka kanganani utsho okunengi ngesimilo sakho.
Kungumhloliswanyana omncinyane okumele udlule kuwo uhwitha ukwedlula ingubo, ngumhloliso njalo okufundisa ukuzehlisa, ukuba umuntu azi ukuba ngaze aqakathekiswe kanganani lapha ayakhona, umbheda wakhe awukunanzi lokho.
Abadala labancinyane, abanothileyo labayanga, bonke balomlandu wokuzendlulela ezabo ingubo, ngendlela efanayo akukhathalekile ukuba ulesikhundla bani ngekhaya, esigabeni kumbe emsebenzini, umlandu wokuthatha izinqumo ngeke uwuvike. Nxa izinqumo sezithethwe zibikezela ekutheni ungumuntu olohlonzi loba cha! Into ezincinyane ziyingozi kakhulu, yikho nje abadala besithi “ubunyonyo buyayibulala indlovu,” ngakho nanzelela izinqumo ezincinyane ozithathayo zingakugwenxa uwe bhazalala.
Kungenzeka ukuba njengoba uMvulo kuthiwa ubomvu, uthole emgodini ogebha kuwo kungasebenzeki, impahla ozingenisayo zingathengwa, imifula yemizwa igcwele ithwele izigodo.
Kube lusuku olunzima, olukhathalisayo, oluxegis’ amadolo. Usuku olungamnandanga luyaluqeda uthando luqede lamandla okuba umuntu aphakamise wona umunwe owodwa.
Uthi lapha usuphindela ngekhaya usuthamulekile, indlala ungasayizwa, usudinwe usuyimpuphu. Lapho-ke inhliziyo iyabe ingasathandi lutho, lamandla okukhuluma kumbe ukulalela ingxoxo engasekho.
Ingqondo zona ziyabe sezithethe ikhefu, umzimba usukuthuma ukuba uyelala. Yikho lapho obona khona ubuhle bokwendlula ingubo lokulungisa umbheda, cabanga ukuba kwenzakalani nxa ubungendlulanga ekuseni!
