Uncategorized

Isigqi somdla: ISIDWABU SAMATSHUMI AYISITHUPHA LANTATHU: Idelele lentanga

23 May, 2019 - 00:05 0 Views
Isigqi somdla: ISIDWABU SAMATSHUMI AYISITHUPHA LANTATHU: Idelele lentanga idelele lentanga

uMthunywa

EDILINI lomtshado siyakubona okukhulu okungangendlovu, abantu bagiya uze ubakhohlwe, okungabantwana kube sekungathi kuzaqamuka, izalukazi ziphenduke intombi kube sengazathi ngumncintiswano wamaxoxo. 

Ngisakhula ngangicabanga ukuba intokozo engaka ibangelwa yikubona abantu abathandanayo behlanganiswa, ukudla ezifela emlonyeni lokunatha amanamunede. Ngangisithi kumbe yikujabulela umakoti oyisiqabhobho, kumbe umkhwenyana oyisipantsha. 

Manje sengikufundile ukuba inengi elitholakala emthimbeni kalikhathali ngabatshadayo kumbe ukudla lakho konke okubukekayo okukhona, okuyikhona okuyinsika yakho konke umuntu akwenzayo yikudinga ukubonakala.

Emtshadweni phela nxa umuntu engabona kumehlisa ukuma emzileni wokudla “sengazathi ngabantwana bendlala” uyakhetha ukuzidingela okwakhe, kuphela ukuba azibonakalise ukuba ungumuntu.

Kukanti-ke omileyo emzileni kafuni kubona ongenelayo, kungayisikho ukuba unqinekela ukudla, kodwa kuyikuziveza ukuba akasi muntu ongadelelwa.

Kulesiphatho ongasamukela ensitha esingavumiyo ebantwini, inkulumo ongayitshaya indiva lisasomisana lilodwa labosowenu, ongeke uyithakazelele exukwini. Impahla ziyantshintshwa, ilizwi lihlanjululwe, ukunyathela kuguquke, ngoba sekulomphakathi.

Nxa ufuna ukubona omama abalesizotha, amantombazana abekekileyo lamajaha ahloniphayo yana emhlanganweni kazulu. Kuqakathekile kuluntu ukuthi bathini ngathi, bayasihlonipha na, ilizwi esilitshoyo liyananzwa na?

Ngitsho losane nxa kungafika abemzini ngekhaya mzwalokho lukhala kakhulu lanxa kungekho okuluhamba kubi, kuyifuna ukunanzelelwa nje!

Ukuzenza ulutho wena ungasilutho kulohlupho lokuthi ngeke uhlale ukhumbula ukuba ubuzenza bani nyakenye, kumbe ngeviki ephelileyo, lokhu okwenze ukuba waziswe nxa sukukhohliwe sungaba sengozini yokweyiswa okukhulu ukwedlula lokhuya obungakwenziwa nga kawuzenzanga lokhu ongayisikho.

Emva kwenyanga omunye owawuthokoza laye kulowaya umtshado kaNdodana loNtombi uzakubuza; “wabacina nini oNdoe loNtoe” uzwakale usithi “. . . obani?”

Nxa usunanzelele ukuba lapha suzembule ibhetshu, ubususithi “Wooo! Laba esasilabo mnzwanokhwana!!” Kuhle kube sobala ukuba ungumqambi wamanga. 

Qaphelisa ungalahlekelwa ngokukhulu ngenxa yokubonwa ngoba sungacina ubonwa nxele. Nxa ibizo lakho lingatshaphazeka loba ngasiphi isizatho akulula ukuligezisa, uphenduka umuntu olobulephero ngezikhathi zeBhayibhili.

Lokhu oyikho nxa kungela bantu woba yikho lanxa sekulabantu, nxa ungafuni kwaziwe ukuba unjani ensitha amehlo engakuboni yazi ukuthi mhlawumbe okwenzayo akumelanga ukwenze.

Kambe kuyavuma na ukufundela ukudla ngefologwe lengqamu phakathi komphakathi, wena wandise ukudla okwesintu? 

Akungcono ukuzidobhela isipunu, kulokuthi ubonakale  suthwele nzima ukuzifaka ukudla emlonyeni? Inkathazo yikuthi nxa usuthintana amahlombe labanye kufika umoya wokuthi “ngeke ngathathelwa phansi.”

Hawu muntu weNkosi, zenzele umusa, kungcono ukweyiswa ngalokhu oyikho, ongakuguqula ngokuya kwesikhathi ube ngumuntu ongcono, kulokuqakiswa ngalokhu ongayisikho ongeke ukufinyelele.   

Ungazenzi umbukiso ngeze; ungayidobhi ifologwe lengqamu wena ujwayele ukuzidlela idelele lentanga!!!

-Thintana loTrevor Mhlanga kunombolo zikamakhal’ ekhukhwini ezithi: +263 775 523 605 kumbe kumakheli omqhafazo la: mhlanga.trevor @gmail.com; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds