Uncategorized

Isigqi somdala: ISIDWABU SAMATSHUMI AYISITSHIYANGALOMBILI LESITSHIYAGALOLUNYE: Esihlahleni

05 Dec, 2019 - 00:12 0 Views
Isigqi somdala: ISIDWABU SAMATSHUMI AYISITSHIYANGALOMBILI LESITSHIYAGALOLUNYE: Esihlahleni

uMthunywa

YAZI ukuthi nxa uhamba endleleni uzibuka, uziqhenya ngelembu olembetheyo, uzitshaya isifuba ngengqondo yomunye umuntu. Ukhona owahlala phansi weluka icebo lokuthunga isigqoko ngayonaleyo ndlela ekwenza unyathele sengazathi uhamba phezu kwamaqanda. Lawe odumisa imota kuze kuvuke omakhelwane, uzikhukhumeza nje ngomsebenzi weyinye inkampani eyayilungisayo. Ngeke ngikubale njengokuphumelela ukuthenga impahla ebizayo, mhlawumbe singathi lo owamkele leyo mali oyihululileyo nguye ophumeleleyo. Akulula ukwenza omunye umuntu ehlukane lempondo yakhe engantshintshwayo ekupha. Nxa liphuma, lisiyatshona kukhona okwenzayo okulawula ukuba isamba sakho siyancipha kumbe siyaqhela.

Induku kayiphoswa nxa kungela xakuxaku, kodwa lanxa singasela zithelo kasiganyulwa. Nxa kutshisa vutha, yiso esiletha umthunzi lapho kutholakala isivikelo. Inyoni zithola indawo yokwenza izidleke kuso, kuthi ubunyonyo lezinye izinanakazana kuhlala kunyakazela kuso. Njengelitshe esakhiweni, sinjalo isihlahla kundalo, yiso esiphayo ngesilinganiso esigabhela esikutholayo. Kusifanele-ke njengabantu ukukha kumthombo wolwazi esiluthola esihlahleni: Ukwazi isizatho salokhu okwenzayo; Ukuba lolwazi thize owaziwa ngalo; Ukuba losizo entweni ezintathu kumbe ezine ezehlukeneyo; Ukwenza okuphathisa umphakathi hatshi wena wedwa.

Kambe ungasikhwela isihlahla somnyi oluhlaza, funa uwe uphezulu, kungazwisiseka ukuthi ubuvele udingani phezulu khonale. Kunjalo-ke lasempilweni, zonke izenzo ozenzayo kazibe lesizatho sibe ngesifanele isikhathi osichithayo kukho lokho okwenzayo. Singabe silezithelo ezidliwayo kumbe cha; kodwa isihlahla loba yisiphi saziwa ngezithelo zaso. UMajayivana waziwa ngomculo wakhe, uKirsty Coventry ngokuntsheza, uTrevor Mhlanga ngezilobo zomdladla, wena-ke? Woba lokwakho okuphawula wena, okungafani lokomunye umuntu kumbe okuthethwe kwezinye indawo, kodwa okuvela ngaphakathi. Okunjalo nxa ukwenza uyakukhwabitha, kakukudleli mzimba njalo ukwenza ngobungcwethi. Lokhu kwenza ukuthi umsebenzi owenzayo ufinyelele emikhawulweni yomhlaba ngoba usenziwa ngesiqongo esiqakemeyo sobungcitshi.

Lanxa sibizwa ngokuthi ngumqokolo, asisebenzi ukuthela umqokolo zwi. Amahlamvu aso yikudla kwenyamazana zasendle, amaxolo aso kuphothulwa kuwo ingxoza, lengatsha zaso zikhipha imiqwayi emihle. Kakube kuwe ukusiza umphakathi ngendlela ezehlukeneyo, kube yizo izifudlana ezithela kumfula wengceko yakho. Loba yiphi ibhizimusi oyenzayo kayibe yimpendulo kunkathazo zika zulu ezehlukeneyo, futhi igxile kulokho oyikho njengomuntu. Kakungabi yikugijimisa imali, kodwa kube yikuletha umqondo omutsha wokuhlangula abantu kunhlupho zabo. Njengomthombo ogobhozayo njalonjalo, impilo yandile futhi inde, izifundo zekelelene, lokuhlakanipha kanye lendlela zokukhulisa isamba sakho kuthatshwa khona esihlahleni!

Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds