uMthunywa
Trevor, Mhlanga
Ubhejane yinyamazana enkulu eyesabekayo, engesabi lutho. Ubucwayi buveza ukuthi linyamazana nxa ihanqiwe, kayizikhathazi ngokudinga isitha esibuthakathaka; ihle iqonde ingqwele yakhona ibhuqane layo. Olesibindi sika bhejane ngulowaya muntu ongabalekeli nhlupho, kodwa omelana lazo manqamu. Umuntu othi lanxa ephila esikhathini esinzima njengalesi anqume njengedada, elabheja lafunga ukuthi ngeke lavuma amanzi alihlale emhlane lanxa liphila kuwo. Yena lowo bhejane owesabeka kangaka, uthi nxa isilwane singakhwaza athuthumele, adinge umgodi angawumba acatshe kuwo kumbe ubhalu angazifihla kulo engabonanga lokuthi sikhwaza singaphi. Kambe ngubani ongalimela ibhubesi?
Abalolwazi ngenyamazana zasendle bathi esiduna kasiphatheki ekuzingeleni, akuvamanga njalo ukusibona sinqwethanqwetha ehlathini.
Nxa sibanjiwe inyazana ngezinsikazi, iyalethwa inyama kulo ibhubesi; livuke lidle kuqala. Kufanele kube njalo ngoba yiso esilomsebenzi omkhulu wokuvikela imuli. Siyadweba umngcele ngomthambiso kube yisikhonkwane esingesuswe esiveza ukuthi lindawo ngeya kwaSibanda esingela mabala. Silale sengazathi kasiboni sibona, kasilutho ukuthi khwimilili nxa kungathi kuba lokunye okunuka santungwana. Abacubunguli bathi indlulamithi ilesondo elingasilahla phansi esisodwa, kodwa ke kayilingi isondele. Akucabange okungenzeka nxa isitha singanqwetha, besesithola ihawu lomuzi lingela mandla ngoba lingadlanga, kungazalwa nkomoni koSibanda?
Ngenxa yokuthi ukudla kwebhubesi akutholwa kalula njengokwezinye inyamazana, lapho sokudliwe kungangcono kulalwe nxa kungela nto emqoka engenziwa. Akusi buvila lokho, kodwa yikulondoloza amandla ukuze asebenze lapho adingakala khona, njengoba abadala besitsho “ikusasa iyabekelwa.” Inala ilinganiswa ngenani leziphala ezigcwaliswe ngamabele kusenzelwa insuku ezizayo, ofunda ulutho oluthile ngokufanayo wenzela ikusasa engcono. Wothi ngikuklekle indlebe; kuyibuwula ukuphila sengazathi ikusasa kayiyi kufika, ukungacebi yikuceba ukwehluleka. Kungceko oyitholayo, imfundo, loba yiyiphi inzuzo; funda kusilwane ulungiselele ikusasa andukuba uzitike.
Umuntu okhaliphileyo angazithambisa zonke lezinyamazana ezibaliswe kulingxoxo. Ucingo luzingeleze indawo ayikhethileyo, azifake khona, njengokukhetha kwakhe. Lanxa sekunjalo umngcele usala ulokhe ukhona phakathi kwesilwane lezinye inyamazana.
Ngitsho laye umuntu angathola ithuba nxa esiza lenyama ukuthi abaseduze kwaso, esenza enanzelela ukuba kasithukuthelisi. Kukhona esizifaka kukho, okungafaniswa lokuthatha isilwane usilondoloze ekhaya. Nsuku zonke uvalo luyatshaya ukuthi kungavele kuphambaniseke okuthile amazinyo azagedla aze axege. Kulokunye futhi okumele ukuxwaye ngoba ungavele ungene kikho uhle ube senkantolo ugqoke ezakho, akusekeleki; lokhuke yikho ukugada isilwane!!!
Thintana lo Trevor Mhlanga kunombolo zikamakhal’ ekhukhwini ezithi:
+263 775 523 605
Kumbe kumakheli omqhafazo la: [email protected] <mailto:[email protected]>; Facebook: Trevor Mhlanga; Twitter: @MhlangaTrev
