Uncategorized

Isigqi somdala: ISIDWABU SAMATSHUMI AYISIKHOMBISA LESITSHIYANGALOMBILI: Ulwa lobani

19 Sep, 2019 - 00:09 0 Views
Isigqi somdala: ISIDWABU SAMATSHUMI AYISIKHOMBISA LESITSHIYANGALOMBILI: Ulwa lobani

uMthunywa

Trevor Mhlanga

Kuyimfanelo ukuba umntwana engazalwa akhale, amadokotela labongi bathi yikho okuveza ukuthi uyaphila kuhle, kodwa mina ngithi yisililo sokusuka esivikelweni esiyisisu sikanina. 

Kuhle kuqale kusesekuncane ukubona udubo lomhlaba, impela kusempini lapha. 

Kudliwa izithukuthuku zitshetshwa ngamanxeba, kuvele kugezwe ngezinyembezi. 

Wonke umuntu uzalwa efumbethe elungele ukungqikilana lazo izinhlupho zomhlaba ezibhahileyo, ikakhulu kithi abansundu. 

Isabelo sakho ungasiswela entokozweni kodwa lakuzo izipantsha kakho loyedwa ongathi kalwazi usizi, lufinyelela sonke. 

Ubugwala buzala ukwesaba lokwehluleka ukuma kulimpi, ikanti isibindi yintebe yabaphumeleli, njengalokhu sesike satsho: Impi izala umnqobi!

Ngesikhathi sempi kazibuse, amalwa ecatsha ayethathwa njengezephula mthetho nguhulumende wabelungu. 

Lokhu kwenza amajaha lezintombi baya emazweni asigqagqeleyo ikakhulu iMozambique, leBotswana ukuze baye fundela ukusebenzisa inkafulakufa. 

Babeqeqetshwa ngempi, langendlela ezicatshileyo zokukhulumisana, langokuceba amacebo okunqoba isitha. 

Lanxa abelungu babelamabutho aleminyaka eminengi esazi ngezempi futhi belezikhali eziyingozi, kwakungelula ukubhekana labantu ababengazi ukuthi bazavumbuluka kuwuphi umgodi. 

Kwakusiba yisivumbuvumbu ukuvela kwabo, kuthi lapho abamhlophe besithi hlomiyani, babe sebenyamalele okomswenya. Kubalweli benkululeko kwakulula ukuhlasela ngoba babesazi ukuba balwa lobani.

Ungakuvuma na ukuba ungeniswe enkundleni yokulwa uvalwe amehlo? 

Ngaphandle kokuthi uyafuna ukwazi lapho onyathela khona, ukubona ukufunela ukwazi ukuthi uqondise nga inqindi, ubone lalo olwa laye. 

Kwaziwa ngumuntu wonke njengobhuqu ukuthi sonke sinjengamasotsha empini ebizwa hambompilo kodwa ake ngibuze, kanje isitha ngubani? 

Ukulwa nje, ungazi ukuba ulwa lobani kufana xathu lokungena enkundleni uvalwe amehlo. Kambe unganqoba ungazi ukuba ulwisani? Kungenzeka ukuthi sonke lesi sikhathi usilwa usadalala, ubukhahlelana lesitha esingayisiso, suzidalele isitha kumhlobo obengaba ligugu kuwe. 

Kanti vele isitha sakho esikuvimba ukuba uphumelele ngomunye umuntu na?

Lalela lokhu, phakathi kwabantu obacunukeleyo, ongakhulumisani labo, lobanina njengeqanda elibolileyo; kakho loyedwa oyisitha. 

Onguye okumele umehlule uyamazi ungamazi, nguye lowaya ombonayo nxa ukhangela esibukweni. Nguye lowo muntu okutshela ukuthi kunzima ukuzingconoza, ungeqale ibhizimusi, ungefunde lutho olutsha, suphuze kakhulu watshiywa yisikhathi, qala ume isikhathi sisesekhona, uzenza bani? 

Zonke izinto eziyinkohlakalo lezinxele ozenzayo zisuka engqondweni yalowo muntu. 

Tshiya-ke ukuzihlupha ngabantu abangelamandla okuguqula impilo yakho isiya ebuhleni kumbe ebubini. 

Usungakwenza ukuthi nxa inengi likhala ngesimo selizwe esimangobongobo, wena ube kuxekana leliya elikhomba ngophakathi ngoba manje ususazi ukuthi ulwa lobani!

Thintana loTrevor Mhlanga kunombolo zikamakhal’ ekhukhwini ezithi: +263775523 605

Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds