uMthunywa
ISIMINYEMINYE lesiphithiphithi esisesidikidikini sakoBulawayo singelinganiswe lesisanasana esikunkundla nkulu yelizwe idolobho leHarare.
Uthi usesendleleni ungakangeni enkabeni yedolobho kuhle kucace ukuthi kukhona okukhona. Izimota zisekelene lemigwaqo inuka amavili, abatshayeli bakhona yizinja ezilobhova, udinga uswele ukuthi bakufundela ngaphi abakwenzayo.
Ungacwayisisa uzakuthola ukuthi ingozi zemigwaqo ezinengi zibangelwa ngabantu abanje abanganaki imithetho yomgwaqo. Nxa besenzenje abakuboni ukuba bazifaka bona engozini kanye labantu ababatshayelayo. Okubuhlungu yikuthi nxa sokusonakala, abantu abangelacala balahlekelwa zimpilo, kuthi lapho okusila khona abayingcosana, kanengi abatshayeli bakhona kuleli nani.
Ngenxa yobunzima bezikhathi esesiphila kuzo, izilwane sezisidla utshani. Elokitshini leLuveve sibona uMnyathelwa othi ngoba esazi ukuba uSomtotoza uyenelisa ukuyitshayela imota, abesemboleka amaphepha akhe okutshayela.
Ngenxa yalokho uSomtotoza uyithatha imota ngonanzelelo engafisi ukuba abomthetho bamhlukuluze, kodwa-ke lapho ekhumbula ukuba ulaso “esincane” angasibambisa omunye wabo ayivuthele engesabi.
Iqiniso yikuthi uSomtotoza ubengazithathela awakhe amaphepha, kodwa imali yesibambiso yokuthatha lawo maphepha ayibambeki, okungcono yikudinga “esincane”. Akugconwa muntu, uhlupho ngumumo esikuwo elizweni.
Akulula ukutshaya indiva indlala kodwa ezidla utshani azekeli ukugula, njalo ziyafa, kodwa ezithi lanxa zilambile zilindele ukujimba zilethuba lokuphila.
Okwenza uzithole ukulesi sigaba yikuthi, mhlawumbe usuzamile ukwenza izinto ngendlela eyiyo kodwa kwehlula, ubugwelegwele benziwa langabantu abazithi yizigcina mthetho. Uswele lalapha ongabika khona ngoba ungethembe muntu, ngenxa yalokho lawe ucine suzingenisa endimeni efanayo.
Yazi lokhu; ungangena emlilweni kawekeli ukutsha, ungangena empilweni yobuguluva kawuphumi ungahluzulwanga yiyo, nxa ingakucitshanga umoya. Isingundengunde bathi “siyadlisa” ikanti siyakudonsa sikucwilise odakeni, usathi kuyahamba konke, imota ikulahle ingene igusu, kumbe ingqikilane leyinye.
Impumelelo kayisuthisi nxa lawe usazi ukuthi awuyitholanga ngendlela eyiyo. Okwenzakalayo yikuthi uyakhathazeka uphakathi kohambo ngenxa yokuthi kawulandeli mthetho womgwaqo, kumbe uphethe amaphepha angasi wakho, kumbe ongatholwanga okusemthethweni. Nxa imota beyimisa ngabomthetho uvalo luyakusebenza, kuthi lanxa uphumelele wafika lapho oya khona umzwangedwa uyakuginqisa.
Umcabango wokuthi mhlawumbe usungabanjwa kawutshiyani lawe, kambe ungakubiza ngokuthi yimpumelelo khonokhu na? Kunzima, kodwa kuyenzeka ukuphila impilo emsulwa, ukunganaki ukuthi abanye benzani, kumbe umumo welizwe unjani, kodwa ukwenza konke okukhulula umoya wakho.
Nxa kuyikuthi usemahlanganweni ezindlela kawazi ukuthi uqonde ngaphi, indlela ebukeka inhle lelula ukuthatha lapho ezithi zingalamba zidle utshani ungayithathi funa uzisole; lindela ukujimba!
Thintana loTrevor Mhlanga kunombolo zikamakhal’ ekhukhwini ezithi: +263775 523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
