uMthunywa
Trevor Mhlanga
UMDLALO wenguqu ulandelwa ngabanengi, futhi ukujula kolwazi lwalokho okumele kwenziwe enkundleni kusebantwini abathanda ukuwubukela.
Uyabezwa bexoxa langezandla ukuthi umdlali lowaya uphambanise ngaphi lokuthi unozinti lowaya ubengahlohlwa njani.
Lapha-ke indlubu iyakhitshwa ekhasini lengxoza iphothwe ngemfanelo.
Umqeqetshi weqembu leliya uyasolwa kuthi umqagi welinye abukwe.
Uyikhwabithe indaba uze ubone sengazathi nguwe obulidlala.
Nxa sekuxoxwa lezi ubutha buyanyamalala, insizwa zihleke zize zithi vutshalala, ukwahlukana ngendimi lemihlobo kuyatshabalala, amantombazana lamajaha sebehlanganiswa ngelikhatshwayo.
Akubizwa ozwayo lapha!
Abanye phela kungathi batatshwa ngalo, impahla abazigqokayo ngezamaqembu abawasekelakayo; emidulwini yamakamelo abo kulemifanekiso yabadlali ababathakazelayo; ingoma abazilalelayo ngeziphathelane lomdlalo, ngitsho lenhloso yabo ekuthengeni amaphephandaba yikuzwa ezintsha ngebhola; kuthi lanxa intengo yokungena enkundleni ingakhwezwa, kube ngcono ukusilela ekudleni kulokuswela eyokuyalibona.
Elakwamanye amazwe lona-ke lintshontshe inhliziyo zabanengi, okokuthi nxa selibukiswa kumabonakude amehlo ayagxila engilazini elibukisayo kube sengazathi abotshelwe khona.
Inhliziyo idabuka okwenina elifelwe ngumntwana nxa iqembu elithandwayo inganqotshwa, mzwanokho uthando luyaphela, inhliziyo ibemnyama, ubuso buhlobe, lengubo zingakhangelwa.
Obuzayo ukuba zidlale njani uba ngoxhophe ilihlo, okungangokuthi sengahululelwa inhlamba eqamula umhlathi wengwenya.
Ngemva kwensuku ezithile bese kuqala ukusolwa kwabadlali, ikakhulu abavimbi lonozinti, kubuye kusolwe umqeqetshi, kuze kusolwe sibi sika nompembe.
Kukhulunywa njalo ibala elilokhe liphindwaphindwa ngu “ngabe” phose kuyo yonke imitsho esetshenziswayo.
Abantu abatshelwa la maphutha enziwe liqembu, kungatholakala lokuthi kabazi lutho ngalo futhi kabalisekeli, lanxa bengatshelwa obekumele kwenzakale enkundleni ukuze kungonakali akula abangakwenza ngakho.
Okhulumayo laye uyaziduduza nje, kodwa inkulumo yakhe iyize ngoba katsheli mqeqetshi kumbe abadlali beqembu lakhe alisekelayo, kodwa utshela abantu mhlawumbe abangayinakiyo inkulumo yakhe.
Kunjalo vele empilweni, izikhathi lamathuba kuchithwa sizikhathaza ngento ezingela sizo, futhi siqina ngokuthi “ngabe.”
Kuhle ukunanzelela amaphutha akho kumbe awequla okulo, kumbe awomuntu ongamfinyelela umbonise ngawo, kusiza ukungconoza amalungiselelo akusasa.
Kuba ngumkhosi wamakhanka ukuthi “ngabe” kodwa kungela lutho olwenzayo ngalokho osekwedlule.
Yamkela ukuba sokwenzakele, ubusuqala ikhasi elitsha usiya phambili.
Isikhathi esifanayo osichitha usola kumbe uzisola, uzabuye uzisole kusasa ukuba usichitheleni ngeze.
Ziqoqe uqoqeke ugadle ithemba olalo ngekusasa engcono ubususenza konke okusemandleni akho ukuliphumelelisa lelo themba.
Nxa ulendlela yokukhulumisana lomqeqetshi kumbe iziphathamandla zeqembu olisekelayo ukuze lidlale ngcono kumdlalo olandelayo, yenza njalo, uchithelani isikhathi ukhala umkhosi wamakhanka?
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
