uMthunywa
Nkosilathi Sibanda
KULENDODA eyadlwengula umntwana wesikolo eZimdabule, eNyamandlovu wazithwala, qede lapho yabulala usana.
Isindabaphenduli le, ngokutsho kwamapholisa asenkambeni yeNyamandlovu angathandanga ukuqanjwa ngoba engavunyelwa ukukhuluma lentatheli, yaqala ukwenzakala ngenyanga kaMpandula ngomnyaka odluleyo.
Kubikwa indoda le, (igama siligodlile) yangena emacansini lenkazana eleminyaka yokuzalwa engu-14, efunda kwesinye isikolo kulindawo. Ngokuya kwesikhathi, wazithwala lumntwana wabeletha ngoNhlangula lonyaka.
Amapholisa kubikwa athola udletshana njalo lokuthi umetheswacala lomkakhe kanye lomakhelwane babopha iqhinga lokuthi babulale ingane ngokuyinathisa itshefu.
“Bangcwaba umntwana phakathi kweguma. Sekuvelile abakwenzayo, umzimba wangcwatshwa kakutsha phandle komuzi.
Isikhulumi samapholisa esabelweni seMatabeleland North u-Inspector Glory Banda utshele iphephandaba likazulu ngoLwesithathu emini ukuba udaba baluphethe, kodwa ngenxa yokuthi alukadingisiswa ngokupheleleyo, kuzamele beme kancane ukukhuluma okunengi.
“Kuzamele siludlulisele emahofisini ethu eHarare lapho okuzaphuma khona umbiko ngoLwesine,” kutsho u-Inspector Banda.
Iphephandaba likazulu lifike eNyamandlovu ngoMgqibelo kwavela ukuthi ludaba olusegudwini kulindawo.
Kutholakale ukuthi ngempela umetheswacala, lomkakhe (amabizo silawo), lomakhelwane wabo okungasatholakalanga ibizo lakhe, babotshwa bahanjiswa eTsholotsho.
Umfakazi oqotho owayekhona mhla isiga lesi sivela, uMnumzana Titus Ndlovu uthe kwasukela ngomnyaka odluleyo ukuhlukuluzwa komntwana. Uthe umetheswacala lomkakhe bavalela umntwana endlini okwenyanga ezingu-9, engavunyelwa ukuphuma phandle.
“Kuthe esezithwele umntwana, bamkhiyela ekamelweni bengafuni ukuthi abonwe ngabantu. Abazali bakhe bavumelana ukuthi mhla ebeletha, kubulawe usana. Bakwenza lokhu bencediswa ngumakhelwane wabo,” kutsho uNdlovu.
“Lokhe safika kulindawo ngomnyaka ka-2000 asikaze sibone okunje. Kuyethusa futhi kuyasinda.”
Udaba lolu luzwise ubuhlungu abezempilakahle labakhankasi bezokondliwa kuhle kwabantwana.
UNkosikazi Jerrina Moyo ongu-Village Health worker ku-Village 4, uthe udaba lokudlwengulwa kwabantwana seluvamile eNyamandlovu.
“Sihlalele evalweni. Abantwabethu sebezithwala bebencinyane. Abanye bayakhomba amadoda endleleni besiya ezikolo kumbe ezitolo, ngokuya kwesikhathi uyabona sebezithwele.
“Siphezulu kokuqoqa umkhankaso wokufundisa abantwana abangamankazana ngendlela abangazivikela ngayo. Sikhuthaza abazali ukuthi banakekele umntwana oyinkazana,” kutsho uNkkz Moyo.
