uMthunywa
Gibson Mhaka
KULENDABA esemlonyeni esigabeni seTsholotsho lapho okutholakale isidumbu senye indoda sindenda kwelinye idamu singela ndlebe lolimi.
Umufi, uXolani Ngwenya kucatshangelwa ukuba wabulawa ngamadoda amane ayehambe lawo edamu leZikhululeni ukuya thiya inhlanzi.
Ukutholakala kwesidumbu kudale ukubotshwa kukaJohn Dube (43) oweLukukwe Line, Innocent Mando (32) Hlalanikuhle Line, Immanuel Dube (48) oweFusini loBlessing Dube (34) ovela eMagwadeni.
UNgwenya ungcwatshwe ngoLwesine ngeviki edluleyo lapho okubikwa imuli yakwabo ibisidla amahabula, ingafuni ukungcwaba, idinga impendulo yokuthi izitho zikamuyi zingaphi lokuthi zakhitshwa ngubani.
Kusenjalo, amadoda amane la amiswe phambili kukamantshi weTsholotsho uVictor Mpofu, besetheswa icala lokubulala ngaphansi komthetho ka-Section 47 Criminal Law (Codification and Reform) Act Chapter 9:23.
Ukuthethwa kwecala kudluliselwe phambili kumhlaka 15 Nkwenkwezi njalo bacetshiswe ukuthi becele ibheyili eHigh Court.
Inkundla izwe ukuba mhlaka 19 Mbimbitho, ngehola lika-9 ebusuku, u-Innocent, Immanuel loBlessing bafika emavinkilini otshwala eTsholotsho Business Centre lapho abadlula bethatha omunye wabo uJohn lomuyi beqonde edamu leZikhululeni, besithi bayathiya inhlanzi.
Kubikwa ukuba ngesizatho esingaziwayo, omsolwa babulala uNgwenya, qede bamjikela edamu.
Batshiya impahla zakhe eceleni kwedamu, baqhubeka besiya emzini yabo.
Isidumbu satholaka ngemva kwamalanga amathathu ngesinye isakhamuzi, esabikela amapholisa.
Umzimba kamuyi wawugwazwe esifubeni, uvuvuke umlomo.
