uMthunywa
Nkosilathi Sibanda
UBENJANI Mwaruwari usebike ukuba isifiso sakhe yikuthi anikezwe isikhathi sokuthi abumbe iqembu eliqinileyo ukuze anqobe isicoco seCastle Lager Premier Soccer.
Castle Lager Premier Soccer League
UMwaruwari ubengumqeqetshi weNgezi Platinum Stars kunyanga ezimbili ezedluleyo njalo bekuyisiqalo ukuthi aphathe umsebenzi lo lokhe watshiya ukudlala.
Umqeqetshi lo ukhulume ngenhloso yakhe ngesikhathi iligi ingena kukhefu ngemva kwemidlalo engu-17.
I-Ngezi Platinum ihlezi kunombolo yesikhombisa kungalane yeCastle Lager, ithwele imiklomelo engu-25.
Lokhe engene esihlalweni, uMwaruwari usenelise ukuguqula iqembu nanko phela alinqobeki enkundleni yalo eBaobab.
Wanqoba iqembu leTenax nge 4-0, watshengisa ukuthi ngaloba yiliphi ilanga, abafana bakhe bagenqula lamaqembu ayesatshwayo kuligi.
Uthe loba engeke ayithwale inkezo yeligi kulisizini kodwa akufunayo yikuthi abaphathi bethimu bamnike isikhathi.
“Inhloso yami yikunqoba iligi,” kutsho uMwaruwari.
“Ngifisa ukuthi iqembu linginike isikhathi engisidingayo.
Ngingene sebedlale imidlalo eyisitshiyagalolunye, basesimeni esihle futhi ngidinga ukukugcina kunjalo lokho.
Ngombono wami kuthatha isikhathi ukuthi iqembu liqonde engikufunayo.
Ngiyajabula kakhulu ukuthi laba abafana bayangizwisisa. Kumele kulungisiswe okuncinyane nje.”
Ngezi Platinum Stars
Umqeqetshi lo ngaphandle kokukhuza iNgezi Platinum Stars, ungumqondisi weBenjani Mwaruwari Foundation, inhlanganiso ehlose ukuvuselela inguqu emalokitshini akoBulawayo.
Inhlanganiso le eyasungulwa ngoNhlolanja inikeza abasakhulayo ithuba lokuthi bazilolonge kwezemidlalo.
Ikhansili yakoBulawayo yavuma ukuthi uMwaruwari aqhube imincintiswano yenguqu kunkundla zayo emalokitshini wonke.
Lokhu ngokwakuqala kuminyaka eyedlula amatshumi amabili ngoba ikhansili ibisehluleka ukuvuselela izakhiwo lezi ezisabalale kuphose wonke amalokitshi amadala.
