Uncategorized

Isifiso sika-Ariel

07 Dec, 2023 - 00:12 0 Views
Isifiso sika-Ariel UAriel Sibanda

uMthunywa

Innocent Kurira

UKAPUTENI weqembu leHighlanders u-Ariel Sibanda ubika ukuba senze konke okusemandleni akhe ukuthi abalwe njengengcitshi kanozinti kuleli.

Kodwa, kukho konke asekwenzile, umdlali lo angeke ajabule nxa engathatha umhlalaphansi iBosso ingakathwali inkezo yeligi.

USibanda uleminyaka yokuzalwa engu-34 njalo lokhe wafika kuqembu leHighlanders, kakaze ayinuke inkezo yeligi.

Ukaputeni lo, ophinda abengunozinti, uphiwe isicoco seGolden Glove ngemva kokudlula imidlalo elitshumi lasitshiya galolunye engahlohlwa.

Usengene kukhalenda yengcitshi zabadlali ngo-2012, 2018 lango-2019.

Kumbali yenguqu yakuleli, akulanozinti awake wakwenza lokhu.

Unozinti weBosso lo, odume ngelithi “Dawu” kubasekeli bakhe, utshele iZimpapers Sports Hub ukuthi usaselomdladla wokuqhubekela phambili evimba amabhola.

“Ngizizwa ngingumfana omncinyane. Ngifuna ukuqhubeka. Isifiso sami yikuthi ngitshiye inguqu nxa iHighlanders ingathwala inkezo yeligi.

“Kuhle ukuba ngibizwe njengentshantshu. Liphupho okumele lifezwe lelo. Ngiyakholwa ukuthi ngelinye ilanga iHighlanders izakuba yintshantshu lami ngisekhona,” kutsho u-Ariel.

Uthe izicoco azitholayo azeneli ngoba kusilela ukuthi kunqobe iHighlanders.

“Kangilali ngenxa yalokhu.Kungifuqa ukuthi ngisebenze gadalala. Yebo sibili ngiphiwe isicoco seGolden Glove kodwa kasiphelelanga nxa iHighlanders inganqobanga.”

Uthe ubengeke wasithola isicoco kungasi kusebenza okwenziwa ngabavimbi ababalisela uMbongeni “Mbola” Ndlovu, Andrew Mbeba loPeter Muduhwa.

“Ngithanda ukubonga bonke abadlali beqembu. Ngiphakamisa abadlali basemuva, imvimbi zethu ezincedisa ukuvala amabhola,” kutsho ukaputeni.

Umdlali lo wengeze ngokuthi kasoke adlalela elinye iqembu ngaphandle kweHighlanders.

Kusenjalo, umdlali weNgezi Platinum Stars uQadr Amini ubeyintshantshu yabo bonke nanko uthethe isicoco seSoccer Star of the Year. Ulandelwe nguDonald Mudadi (Dynamos) lo-Obriel Chirinda (Bulawayo Chiefs).

Share This:

Sponsored Links