uMthunywa
INtatheli kaMthunywa
UMDLALO we-karate usuzasungulwa ezikolo zonke kuleli kulandela inyathelo lenhlanganiso yeZimbabwe Karate Union (ZKU) lokubumba amalunga alumdlalo ezweni lonke.
Inkokheli zalumdlalo zitshele iphephandaba likazulu ukuthi ziphakathi kokukhulumisana lenhlanganiso yeSport and Recreation Commission ngemizamo yokuthi zethule uhlelo okuzaqhutshwa ngalo umdlalo ezikolo.
Umgcinisihlalo we-ZKU uGeorge Maposa wazise ukuba ngaphandle kokusungula i-karate ezikolo, inhlanganiso le izavula amahofisi abaphathi bezomthetho, ukusakazwa kwembiko yayo lokubumba ihofisi kanobhala.
KoBulawayo umdlalo we-karate ulosekelo ukwedlula zonke indawo kuleli. Ukusungulwa kwawo ezikolo kulakho ukwamukelwa ngabantwana labazali.
Isikhulu se-karate koBulawayo uSensei Ndabezinhle Mazibuko uthe kubalulekile ukuthi abantwana bafundiswe indlela eqondileyo yalumdlalo.
Kubikwa loba ikhona imfundiso yalumdlalo, sekubonakele ukuthi abantwana abafundiswa ngokupheleleyo.
“Kuqakathekile ukuba lenhlelo zemfundiso yomdlalo we-karate ezikolo ngoba ithalenta elisakhulayo lizafunda okuyikho,” kutsho uSensei Mazibuko.
“Leli linyathelo elihlose ukukhuphukisa izinga lomdlalo lokwethula izitayela zomdlalo ezifundiswa eZimbabwe.
Sinanzelele ukuthi imfundiso kubadlali ibingexakileyo, ngakho kudingeka ukwenza izinto ngendlela efaneleyo.”
UMazibuko ubike njalo ukuba isabelo sakoBulawayo siphezulu komsebenzi wokucupha imibono kungatsha ezitshiyeneyo ezibalisa logatsha lwezemfundo.
Ukwethulwa kohlelo lwezifundiso ze-karate kubikwa kukhangelelwe ngoNtulikazi nxa izikolo sezingene kuthemu yesibili.
Abadlali bakhuthazwe ukuthi baziphathe ngesikhathi lumdlalo usamiswe yimikhawulo yeCovid-19. Inhlanganiso yeZKU ithe abadlali abajwayele ukulolongwa besezindlini.
