uMthunywa
Silo Trevor Mhlanga
UNGACABANGA ngaleso sikhathi lapho izifiso zakho sezigcwalisekile; usuhlezi phakathi komhlane lembeleko, usidla amafidlongo; inhliziyo itshaya kuzwakale, legazi ligijime. Ilihlo lengqondo liyawubona umphimbo usuwuqandisa ngamanamunede abizayo, ngapha indlu ihlotshiswe ngamaluba anukelela kamnandi, lemifanekiso emihle igaxiwe emidulwini. Lelo phupho, yilo mpela elenza usebenze gadalala; kakho loyedwa ongafisi kuphakama. Ekuhambeni kuhambo lwempilo, okwenza ufinyelele esiqongweni akusi kusebenza gadalala kuphela, kodwa yikuqansa eyakho intaba. Sokungenzeka ukuthi ufake amandla akho wonke usimba umgodi, ikanti ngowokwembela wena, ngakho kukho konke okwenzayo woba lesiqiniselo ukuthi kuzakuphakamisa, qansa intaba.
Izifiso zethu kazifani, njalo kazilingani, lapho abanye abaphutsha khona kulapho abanye abaqala khona. Ophutshileyo nguye othiwa uphumelele kulalo osanda kuqala nxa bonke bengaphelela esigabeni esifanayo. Ngamafitshane, ukuphumelela kutsho into ezehlukeneyo ebantwini abehlukeneyo. Kimi ukuphumelela akutsho inzuzo lenhlalakahle kuphela, kodwa kutsho ukuguqula izimilo zabanengi zibe ngcono; ngitsho ukungconoza impilo zabantu ekwenzeni, ekucabangeni, lekuhlalisaneni kuzigidi zabantu kuzulu okuzenza umphakathi, izigaba lelizwe kuguquke ngedlela emangalisayo. Lawe kumele ube lowakho umfanekiso oveza ukuba ukuphumelela kutshoni kuwe, yilowo umfanekiso okuvezela intaba okumele uyikhwele ukuze ufike esiqongweni sokuphumelela.
Nxa kungela mbono abantu bayafa. Isidumbu singcono kulomuntu ongela mbono, ngoba kuyazakala ukuthi siyabekwa ngaphi, kodwa ongela mbono usemnyameni obambekayo lanxa ezula ezitaladeni. Ekuqanseni kwakho ukufeza isifiso sakho, kulezihlahla zameva ohlangana lazo zikudwebadwebe ijwabu, usale sumahadluhadlu sengazathi yinsimu elinywe ngenkomo. Kukhona njalo utshani obumilayo khonapho entabeni, uthi uyanyathela utshelele, idolo litshayelele phezu kwelitshe, ubuhlungu bakhona bufike lasethanjeni; unyawo luqhaqhambe. Konke lokhu kufikela wonke umuntu oqansayo entabeni, ngendlela ezitshiyeneyo kodwa akumelanga kube yisizatho sokuthi utshiye ukuqansa ngoba ungahle uwele phansi wephuke intamo.
Oqansileyo wafika enhlokweni yentaba, intokozo aba layo igabhela ubuhlungu bendlela. Usabhenqu sengatshaywa nxa umuntu eseze wakuthola lokhu abekuphupha. Kwesinye isikhathi kuyenzeka ukuthi uthi uzitshela ukuthi usufikile ubusunanzelela ukuba ulahlekile, intaba oyiqansileyo kayikufikisi la ofuna ukuyakhona, okuyikuthi sokumele wehle uqale phansi. Ubuso buhle buhlobe legazi linqume. Kufana lokunanzelela emva kwensuku ezimbalwa ulima ukuba inhlanyelo obuyihlanyela iphehliwe. Kubuhlungu kunjalo ukuba isikhathi lamandla, mhlawumbe lenzuzo sokuchithwe entweni engayisiyo; okudingakalayo yikuhlala njalo phansi udinge okuyikho ngqo obekufanele ukwenze, bese uqala phansi. Kuyingozi ukuhlala entweni esobala lakuwe ukuthi akusi yakho, lanxa suphumelele kuyo kanganani itshiye, funa okungokwakho ukwenze ngcono. Akulula-ke lokhu, kodwa kumele kwenziwe, ungabambi ngamandla ukuhlala uphezulu wena uqanse intaba engayisiyo!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
