Uncategorized

ISIDWABU SAMATSHUMI AMAHLANU LASITHUPHA: Ilempethu phakathi

04 Apr, 2019 - 00:04 0 Views

uMthunywa

Silo Trevor Mhlanga

KULEZINSUKU ilanga litshisa bhe, futhi liqala ukubasela kusese kuseni likhipha inhlanzi emanzini iyecatsha emthunzini. Sokuyimvama ukubona abantu bezithwalele izigujana zamanzi ngapha bezifihle ngaphansi kwezambulena. Lanxa lisosa umhlaba kangaka, kukalutshwane ukuzwa kuthiwa kulomuntu thize oqaleke edolobheni ngenxa yelanga.

Esinye sezizatho salokhu yikuthi abantu sebesazi indlela ezinengi zokuzivikela ekuxatshweni lilanga. Esinye njalo yikuthi kakho ofisa ukuyangeka edolobheni, seyinkulumo yelizwe lonke, kube lomunye njalo ongafisi ukuthi akhitshwe izicathulo phakathi kwabantu kubonakale amasokisi  adabukileyo kumbe kuzwakale izicathulo ezilephunga. Endaweni yokuthi asizakale, acine esengothathwa imifanekiso ngabantu esenziwa inhlekisa kubomakhal’ ekhukhwini. 

Uyambona umuntu ehamba eziqhenya ekhangelela abanye emanzini, enyathela sengazathi wesaba ukungcoliswa ngumhlabathi, ececile, egcobe amakha anukelelayo, kodwa amasokisi engadabukileyo. Omunye njalo uyamthola engelawo amasokisi esenza sengazathi yikho ukugqoka kwalezi nsuku, kukanti vele kalawo, njalo uyazazela ukuba izicathulo zakhe zedlula igundwane elifileyo ngephunga. Abanye abantu sinjalo, kulezimo esiziveza kumphakathi, saziwe siyibuthanathana kodwa umuntu lomuntu manqamu ezazela lokhu ayikho khona. Siyakuthanda ukuziqakisa ngalokhu esingeyikho, abantu basiqhuqhe ngoba bebona sengazathi siyilokhuya kodwa kungenjalo. Amanye amajaha lezintombi ikakhulu uyababona sebeze befika esigabeni sokweboleka impahla ebanganini, ukuze babonakale beyilokhu abazenza khona, omunye aze akhonjwe kumbe aqonyiswe ngenxa yedlela abonakala eyiyo. Zwana wethu; uma umuntu ezenza ulutho yena engasi lutho uyazikhohlisa, litsho njalo iBhayibhili.

Amasokisi kulesi sifundo amele isimilo sakho, wena qho. Ahitshayo ngephunga yisimilo esingcolileyo esidinga ukulungiswa, adabukileyo amele ukulahlekelwa yimikhuba emihle obulayo ngenxa yezizatho ezehlukeneyo. Abadlula zisengwa kwabozala yibo ke labo asebebalwa njengabantu abangelawo amasokisi. Kakho ongazaziyo ukuba uyisima kanjani kulindaba kodwa okukhathazayo yikuthi abanye kasifuni kulizwa iqiniso lokuba kumele izimilo zilungisiswe ukuze konke kuhambe ngendlela. Oqhubeka egqoka amasokisi angcolileyo, acina esenganithikayo angakhangelekiyo njalo anuka phu! Isiphetho yikuthi adabuke acine engasagqokeki eselahlwa. Ukonakala kwesimilo kunjalo, kuqala ngomkhuba owodwa omubi, wokuphuza emsebenzini kumbe esikolo, kumbe ukuqamba amanga, kumbe ukuhleba, njalonjalo. Kucina kukhula kukwenza umuntu ongathembakalanga, isigelekeqe, umaswelaboya, uzozo.

Okwande ukwenzakala yikuthi umuntu uyavala isimilo sakhe esingahlambulukanga ngokuya ecaweni. Omunye njalo ngobonakala ezimfeni esekhipha imali eziqatha edinga kuphela ukuninda abantu udaka emehlweni. Lokhu kufana xathu lempahla ezinhle kanye lamakha anukelelayo emuntwini olamasokisi esiwabalise phezulu. Loku yikho ukugezisa inkomitsho ngaphandle yona ilempethu phakathi. Ukuze uphumelele, guqula izenzo, qala unyawo olutsha. Ungekela ukwenza njalo hlala usazi ukuthi imisebenzi yakho ebonakala imihle ebantwini, ilempethu phakathi!!!Thintana lo Trevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds