uMthunywa
Silo Trevor Mhlanga
EZITALADENI zedolobho lakoBulawayo lingatshona elikaMlimu ulibazise amehlo lendlebe, kugcwele abantu abatshiyeneyo; abanye ngabathengisayo ababizela abantu lapha abahlezi khona; kube labanye abazwakala bexoxa ngezombusazwe kungacaci ukuba bavele besenza ngokwani; labanye njalo ababhodabhodayo bedinga abakudingayo.
Izimota ziyehla ziyenyuka, bakhona ababizela abantu ezimoteni bona bengayi kuhamba ngazo, kuyaphithizela kuswelakale indawo. Kulokukodwa okutholakala kuwonkana umuntu okhona lapha, abacwebileyo labayanga, abahlala ezitaladeni, ngitsho labagogegileyo: ngamazwi. Izimungulu ziyawaloba, ziwakhulume ngezandla; iziphofu ziyawacula, ziwakhulume ngemilomo; imbongi ziyawagiya, ziwahaye, ziwacecise, ziwacacise, ziwachasise, ziwacacade, ziwacazulule.
Ngamazwi ujaha uyamncenga udade, amhlekise, amlolonge, aze atshontshe inhliziyo yakhe, kwakhiwe umuzi. Izixhwali ziyawasebenzisa ukuqilibezela, ukukhohlisa, lokwethusa; abatshumayeli labo badonsela izimvu enkosini ngawo. Ayisiphiwo esasiphiwa nguThixo ukwelulekana, ukuxwayisana, lokuxoxisana. Ayindlela esetshenziswa yizigilamkhuba ukona, ukuzivikela lokukhuthazana ekwenzeni okunxele.
Inkulumo ethile iyamphakamisa umuntu imkhusele, imthume ukusebenza ngamandla lokhu akwenzayo, kukanti eyinye iyamcobodisa, imeyise, omunye aze afike esigabeni sokuzicitsha umphefumulo. Ingxabano ezinengi zidalwa yikuthi uSinanzeni usuke wathi lokhu lalokhuya ngoSoniwe kuhle kube yizifokolo. Ngitsho leBhayibhili liyakufithizela ukuba amazwi angamlahla umuntu kumbe amsindise, okutsho ukuba kuqakathekile ukukhetha okutshoyo sonke isikhathi.
Izikhathi eziyingozi ukukhuluma, kulapha uthabe kakhulu, kumbe uthukuthele, kungcono ukuthula ngezikhathi ezinjalo. Akukuhle ukuzibona suthembise into ongezake uyigcwalise, kumbe usukhulule inkalakatha yezwi ozazisola ukuba ulikhulumeleni. Ukwenza njalo kuyakululazisa emphakathini, kukunqunule kuzulu. Okukhangelelweyo yikuhlala ukhuluma amazwi enkuthazo, enduduzo lawethemba. Lanxa isimo sisibi, umlomo kawukhombe ikusasa engcono, kawube ngumlawuli wethemba. Hlala uxoxa ingxoxo eyakhayo, encoma okuhle kodwa ungekeli ukuxwaya okubi. Lokhu okuhlala kusemlonyeni wakho, kuyasengela engqondweni, besekubumba isimilo sakho. Akucabange ukuba nxa ungosolayo, lohlambalazayo sonke isikhathi, uzibumbela isimilo esinjani?
Indlebe zingezwa kuthiwa “saa . . . !” inja iyagijima isilole amazinyo ingakaboni lokuthi kuyini okunikelwayo. Isizatho yikuthi ivele ihlala iqaphele khonokho, umuntu laye unjalo. Ohlala eqaphele indaba ezinhle uyazizwa zingakakhulunywa, lanxa etshelwa amazwi angamahle kaphangi ukuthukuthela, kube kanti ohlala eqophe ezimbi uyacunuka lanxa bemsomisa. Wothi asambe emuntwini olonyawo olulumayo, uhle umbone selungele ukuhamba engazi lokuthi kuyiwa ngaphi, uthi azitshe emuntwini othanda ukulwa, igazi liyachitheka komunye. Lawe uyazazela amazwi akuqubula ukuba wenze ubuthanathana. Isifundo lesi sibambisise sizakusiza empilweni ukuba ungachithi isikhathi ngeze: nxa ufuna ukutshona uphikisana lephikankani litshikatshikana kodwa kungaphumi lutho, wothi nkwe!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
