Isidwabu samatshumi amabili lasithupha: Suphelile umdlalo

23 Aug, 2018 - 00:08 0 Views

uMthunywa

Silo Trevor Mhlanga

Yonk’ into ilesikhathi sayo, leBhayibhili litsho kanjalo, isikhathi esedlule besingesokuzwa ngelikabathi, manje yisikhathi sokuba ibunda lisikwe ngawe. Ukubekezela kulungile njalo kuqakathekile ukuze uthole ukuyikho qho okukufaneleyo, kodwa lesi akusi sikhathi sokubekezela!

Sesiside isikhathi uthule kwangathi awukho, kade wancindezelwa kwangathi awuboni, manje sokuyisikhathi sokuba into ziguquke.

Nguwe kuphela ongakuveza sobala ukuba asisekho isikhathi sokuphozis’ amaseko, lesoku lalela befeketha; manje yisikhathi sokuthi bonke bazi ukuba suphelile umdlalo!!

Uyakhumbula usand’ ukuqal’ ukufunda, ukuviyo lokuqala kumfundo yangaphansi? Yikho lapha owaqala ukubona ukuqakatheka kwamaqembu ekwenzeni into ezehlukeneyo.

Kwakulequla labadla ndawonye umphako, kulelinye labalemali yokuzithengela noma yini abayithandayo; babekhona njalo abokungezwa, kukanti labo mahamba yedwa babe ngaswelakali.

Okwakuvamile yikuthi leziya ezingezwayo zazidlisa abanye imbuya ngothi, ababephakathi komgigo lengiga kakhulu ngomahambayedwa. Babengela ongabamela ngakho kwakulula ukukhanzingwa kwabo.

Uyambona lowaya umntwana uMaz’thulela owayengatholakali ngitsho lasebhukwini lababanga umsindo, nguye phela owayehlala esenziwa inhlekisa, njalo kuthi mzwana zivalwa bavale ngaye.

Wawumzwela lawe kodwa ngenxa yokwesaba ukuthi funa babhodlisele phezu kwakho ungazama ukulamula, wawusenza sengazathi kawuboni bese usiya ceba kubabalisi kube yindlela asinda ngayo.

Manje bangawe, kukhanya kungela lokunanzayo, kakho futhi lombalisi ongayaceba kuye, kumele uzimele.

Kulezinto ongeke wazekela ziqhubeka zisenzakala kuwe zikubisela emuva, wena uz’thulele okwemvu.

Namhla, yiso lesi isikhathi okumele uvuse ikhanda, uqunge isibindi umelane lendlela ezimi manzonzo ebese zisiba yinhlalo yansuku zonke. Ungekelela okungaqondanga kuphumelela kawuzoneli wena wedwa kodwa uphambanisa isigaba sonke.

Kulezinye izinto ezilungisiswa ngokuvala owakho, kodwa kulokhu nxa ungawuvala wenza ukuba ububi bumemetheke labaxhwalileyo baphumelele.

Akucabange ukuba nga wawungaz’thulela utshaye indiva lapho ubona uMazithulela bem’thelela yizigangi zabafundi, ukuthi kwakuzahamba njani? Okwenzayo ngenxa yalokh’ osuhlangane lakho kumele kuveze ukuba uhlezi ucabangela ikusasa.

Nxa wawusiya ceba, wawusenzela ukuba lakusasa okuyiziganginyana kwazi ukuba kungaphatha kubi abanye, bakhona ababalisi abalamandla kulabo abazaba bonisa into yamehlo.

Ngendlela efanayo nam’hlanje, ngenxa yokuthi sokumele uwuqede umdlalo, yazi ukuba lelo lalelo nyathelo olithathayo libumba ikusasa yakho; kukuwe ukuba izakuba yikusasa enjani.

Bambisisa lokhu, abakuncindezelayo abanye bakhona ngabakade bezenza abangane bakho; kabayi kukwekela uvusa ikhanda bakuhlekelele; zimisele ukumelana labo ngoba ngeke waphumelela nxa ungasukumanga waboph’ inkalo, waveza sobala ukuba suphelile umdlalo wokudlala ngawe!!!

Thintana lo Trevor Mhlanga kunombolo zikamakhal’ ekhukhwini ezithi: +263 775 523 605. Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds