YiNtatheli kaMthunywa
OKWENSUKU ezintathu isidumbu senye indoda yeRaffingora kubikwa sasihlabela siphinde sivumele ingoma ezazihlatshelwa ngabantu ababesesililweni, ngemva kwalokho sakhwehlela okwabangela ukuthi abantu baphume beminyezelana kuleyondlu njalo sebetshwaqe lemzimba.
Abantu ababesesililweni sikaAffet Mupeyami obeleminyaka yokuzalwa engu-19 kubikwa babaleka inyawo zaze zatshaya esiphundu bebalekela endlini eyayibekwe isidumbu sayo nanko phela kuthiwa sasesiqale ukuhlabela ngapha sibhodla ngelizwi lakhe “impela”, kodwa ngemva kwesikhathi sezwakala ngezwi lowesifazane okwabangela ukuthi umufi aphuze ukubekwa izihlobo zisesaba ukungcwaba umuntu ophilayo.
UMnewabo kamufi uFannuel Mupeyami uthe babesemlilweni ngesikhathi omama bephuma endlini bebaleka.
“Sasihlezi emlilweni samangala omama bephuma begijima bethi umuntu ofileyo uyahlabela. Samangala ukuthi kungabe kusitshoni lokhu loba sasingakukholwa ekuqaleni. Sangena endlini sayalalela kodwa waqala engahlabeli wasehlabela ngokuya kwesikhathi,” kulandisa uMupeyami.
Omunye umngane wemuli le, uChristpher Albhero uthe unina kamufi nguye owaqala ukuzwa ukuthi umntanakhe uyahlabela.
“Omama basilanda emlilweni bafika bathi isidumbu siyahlabela. Satshela omama ukuthi sibuyele sonke endlini bahlabele ukuze sizwe ukuthi bakhuluma iqiniso. Safika savula ingubo sathi omama kabahlabele kodwa kasizange sihlabele ngemva kwesikhathi eside saqala ukuhlabela.
Sisizwa ilizwi sakhangela umlomo wawunganyikinyeki kodwa sasesinanzelela ukuthi ilizwi lalivelela esiswini. Sazama ukubamba isidumbu ukuze sibone ukuthi ngempela ufile ngoba sesisesaba ukungcwaba umuntu ophilayo,” kutsho uMnu Albhero.
Unina kamufi uNkosazana Dadirai Nyamandu uthe nguye owaqala ukuzwa umntanakhe ehlabela.
Unina aAffet
“Yimi engaqala ukumuzwa ehlabela kodwa kangizange ngihle ngitshele abantu khonapho khonapho ngaqala ngama.
Kuthe ngemva kwesikhathi ngasengitshela omama ababehlabela ukuthi umntanami uyahlabela njalo wayehlabela ngelakhe ilizwi. Loba kwakumele simbeke ngelanga elilandelayo sacina sisima sidinga abomoya ukuze basincedise ngoba sasingeke simbeke ngemva kwesiga lesi,” kuchasisa unina kaAffet uNyamandu.