Uncategorized

Isidumbu phansi kulwiwa etshabhini

11 Jul, 2024 - 00:07 0 Views
Isidumbu phansi  kulwiwa etshabhini

Thokozile Mbedzi

KULENDODA yeMontgomery koBulawayo ebulele enye etshabhini ngempelaviki kubangwa isikhwili esingasachazwanga.
Kubikwa uShepherd okungasatholakalanga isibongo sakhe ugwaze uBrian Nyoni oleminyaka engu-25 wafa ngesikhathi benatha utshwala kwenye itshabhini eseMontgomery.

Ekhuluma lentatheli kaMthunywa uMnumzana Lungisani Dube uthe lokhe belesithuli ngesehlakalo sokubulawa komuntu benganakaneli.

“UShepherd loBrian bebenathisana utshwala, asazi ukuthi kusuke kwathini baqala ukulwa bedonsana besiya le lale.

“Ababili laba bebebanga isikhwili kodwa kabazange basichaze sobala. Baphuma phandle bayakuma ku-caravan singazi ukuthi uShepherd usesiyamsusela amanqe.

Khonokho uShepherd wakhupha ingqamu wamhlaba esifubeni wahle wawela phansi wafa.

Kubikwa umetheswacala ebona ukuthi usefile wahle wacela ezinyaweni njalo akwaziwa ukuthi watshona ngaphi.

Isikhulumi samapholisa akoBulawayo uInspector Abednico Ncube ebuzwa ngodaba lolu uvumile ukuthi lwenzakele.

“Udaba lwendoda egwazwe yafa etshabhini solufikile ehofisini yethu.

“Njengamapholisa sithanda ukuxwayisa uzulu ukuba angabozama ukuxazulula inkinga ngokulwa, abantu kabadinge indlela zokukhumisana umlotha ngokukhuluma hatshi ngodlame.

“Uzulu kaxwayane lokuvula ematshabhini endaweni abahlala kuzo ngoba lokhu akukho emthethweni.

“Sithanda ukukhuthaza yiloba ngubani ongabe esazi lapho okwatshona khona umetheswacala ukuthi abikele amapholisa aseduzane laye ngokuphangisa,” kuphetha uInsp Ncube.

Share This:

Sponsored Links