uMthunywa
Nobuhle Mgwaqo
ZIZIDLA amathambo engqondo izakhamizi zesiqintini seMagobho, eMandalay Farm esigabeni seMguza ngesiga senye indoda okucatshangelwa ukuba yagalula ngenyanga kaNhlolanja kodwa lalamuhla lokhu isidumbu sayo kunye lempahla kungabonakali.
Okwenza izakhamizi lezi zizidle amathambo engqondo njalo zitshwaqe umzimba yikuthi ngesikhathi uVasco Mpofu obeleminyaka engu-25 edingwa kwathutsha izinja zisilwa zibanga umunwe.
UMthunywa ukhulume loThompson Kumalo ongumzawakhe kaMpofu uthi yena wafonelwa mhlaka 7 Nhlolanja wahle waqonda eMagobho.
“Ngithe ngifika khonale abantu bathi bacina ukubona uVasco ehamba loFreeman mhlaka 6.
“Ababili laba baba lokungazwanani baphinda bangathi sebelungisile indaba yabo.
“Kuzwakale ukuthi basuka sebelomnawakhe kaFreeman besiyageza emfuleni uMguza.
Uqhubekele phambili esithi kukhanya bathi sebesemfuleni uVasco wathi ufuna ukubatshengisa ukuthi yena uyazi ukubhukutsha.
“Ngokutsho kukaFreeman kukhanya uVasco wathi elokhu esabatshengisa ukubhukutsha, uFreeman wasuka wahamba.
“Umnawakhe yena uthi uVasco wagalula. Ngelanga elilandelayo mhlaka 7 uFreeman uthi wavuka esiyadinga uVasco ngakibo wamswela wahle waqonda emapholiseni. Amapholisa amtshela ukuba kumele abike ngemva kwamahola angu-48.
“AbeSub-aqua unit bafika badinga kodwa kabazange bambone.” Uqhubekele phambili wathi isimanga kuye yikuba amanzi ayefika emadolweni okwenza wakulandula ukuthi kulomuntu omdala ongagalula kungatshoni.
“Mhlaka 8 ebusuku kwazwakala umkhosi izinja sezibonakele zibangisana umunwe. Izakhamizi zafika zambokotha umunwe lo ngebhavu. Izakhamizi zaqoqana zaba ngamatshumi amahlanu zaqala ukubhoda zidinga kodwa akulasidumbu esatholakalayo.”
“Lalamuhla lokhu lokhu simdinga umfowethu kodwa kabonakali. “Njengemuli sifisa ukuthi umunwe lowu uhlolwe kodwa amapholisa athi lokhu kwenzeka nxa kulomzali wakho osaphila kumbe umntwana ngokusweleka kwenhlanhla bonke abazali bakhe kabasekho njalo ubengelamntwana. UVasco ulabodadewabo abathathu kodwa kukhanya labo ngeke basize kulokhu,” kulandisa uThompson.
Omunye njalo umzawakhe kaVasco, uNorman Kumalo uthe njengemuli balemibuzo eminengi ngokunyamalala kwesihlobo sabo ngoba kabasuthiseki ngalokhu okuthiwa kwenzakala.
“Ngaphandle kwalokhu sokulamahungahunga esigabeni okuthi kungabe kulomunye usiyazi olesandla ekufeni kwakhe ngoba efuna ukwenza umuthi. Asazi ukuthi iqiniso yiliphi,” kuchasisa uNorman. Isikhulumi samapholisa koBulawayo uInspector Abednico Ncube ebuzwa ngodaba lolu uthe bachwayisisa udaba lomuntu ongabonakaliyo ungezelele wathi okwakhathesi akukho okuhlanganisa umunwe owabonakalayo.
“Kulensolo njalo zokuba angabe wagalula. Okwakhathesi akukho okusenza sifise ukwenza iDNA kodwa kungaba lendingeko silengcitshi ezenza umsebenzi lo.”
