uMthunywa
Nkosilathi Sibanda
BABEZIGQAJA abadlali labalandeli beChicken Inn ekuqaleni kwesizini besithi elabo iqembu alehlulwa yilutho.
Kwabayinjabulo eyadonsa isikhathi eside ngoba babenqoba maviki wonke, kwaze kwavuma lezitha zabo, sekukhangelelwe ukuthi linqobe isizini ize iyephela. Imisila ibiqaphile kuhlekana labalandeli laba, beyichaza ngokuthi ayidleki.
Kodwa, kuthe sekubanga isigaba sesibili sesizini, iChicken Inn izinto zatshintsha, yaqala ukudliwa.
Iqembu leli lifike enkundleni ezinengi lehluleka ukuthola imiklomelo yonke njengalokho elalikwenza ekuqaleni.
Umqeqetshi wayo uJoey Antipas usolwe ngabacubunguli bomdlalo ngendlela ayekela ngayo iqembu lilahlekelwa yimiklomelo. Ngemva kokukhokhela ingalane yeCastle Lager okwamaviki ayedlula itshumi, iChicken Inn yazibona isihleli kunombolo yesithathu lapho eyahlala khona amaviki amahlanu.
uJoey Antipas
Ithwale ubhulo isehlulwa yiTenax, qede lapho yaba yikudla kweBlack Rhinos. Yanqotshwa yiDynamos leFC Platinum yaqhubeka ilahla imiklomelo kuYadah, Herentals leManica Diamonds.
Okwakhathesi, ngemva kwemidlalo engu-29, iChicken Inn ithe khoxo kunombolo yesibili kungalane yeCastle Lager, iphethe imiklomelo engu-54. NgeSonto idibana lomakhelwane iHighlanders kumdlalo weCastle Lager lapho ababukeli abazafuna ukubonisa ukuthi isaqine okungakanani.
Pho abalandeli bayo bengabe besabika ukuthi ayidleki?
U-Antipas, ekhuluma lentatheli kaMthunywa ngoLwesithathu ekuseni uthe usebophe waqina njalo uzaqinisekisa ukuthi inganqotshwa.
“Akusoke kube lula kodwa siyazethemba,” kutsho u-Antipas.
Uthe abalandeli bengazihluphi ngempumela eyadlulayo ngoba elakhe selilungisile amaphutha.
“Nxa ungakhangelisisa imidlalo edluleyo, kucacile ukuthi sekulotshintsho eqenjini. Umdlalo wethu leHighlanders umkhulu, kulomsebenzi. Siwulungiselele.”
Kweminye imidlalo kuligi yeCastle Lager, iBulawayo Chiefs idlala leBulawayo City enkundleni yeLuveve ngoMgqibelo. Kubikwa umqeqetshi weBulawayo Chiefs uNilton Terroso uzaqeqetsha ngokuthumela imbiko ekubo ePortugal kumidlalo eseleyo kuligi yeCastle Lager.
Lokhu kungenxa yokuba i-permit evumela ukuthi asebenze kuleli isiyedlule. Ubevunyelwe ukuthi aqeqetshe Amakhosi Amahle okomnyaka owodwa.
Umbiko ophuma kuleli iqembu uveza ukuba loba uTerroso uzabe esePortugal, uzaqhubeka eqeqetsha iqembu ngokuncedisa ngamacebo alawo. Okwamanje umsekeli wakhe uThulani “Thuts” Sibanda uzabamba isihlalo.
iligi yeCastle Lager
UTerroso utshiya iqembu lilinde ukuyafinyelela inkezo yeChibuku Super Cup, kusigaba sama-semi-final.
