Imihlobo yesibaluli
UDoke wehlukanisa iziqu zesibaluli kane.
Iziqu zomdabu – Izibonelo –banzi; -duma; -qatha njalonjalo.
Iziqu ezisuselwa emabizweni : lukhuni –ukhuni; bomvu –ibomvu; lula-ilula
Ezokukhomba –ngako; ngakaya njalonjalo. Eziyingxubevange- -thile; -thize; -njani njalonjalo.
Ubumnini: Ngaphansi kobumnini sizakhangela ingxenye ezilandelayo: izivumelwano zobumnini, iziqu zobumnini kanye lobumnini besigaba 1a. Leli gama lisebenza lichaze ibizo loba isabizwana. Lalo lidinga kubekhona ukuvumelana phakathi kwesiqu sobumnini lebizo elisichazayo.
Ake sikhangele ukwakhiwa kwalezi zivumelwano ezilandelayo ngaphansi kwalezi zihloko: Izivumelwano zobumnini: Isigaba, isivumelwano senhloko, isakhi sesichasiso lesivumelwano sobumnini. Kusigaba 1, isivumelwano senhloko u- sihlangana lesakhi sesichasiso -a sithole isivumelwano sobumnini wa-. Kusigaba 1a, isivumelwano senhloko u- sihlangana lesakhi sesichasiso –a sithole isivumelwano sobumnini wa-
Kusigaba 2, isivumelwano senhloko ba- sihlangana lesakhi sesichasiso –a sithole isivumelwano sobumnini ba-. Kusigaba 2a kwenzakala khonalokhu okunjengalokhu esesikuqambile ba- +a > ba-. Kusigaba 3, isivumelwano senhloko u- sihlangana lesakhi sesichasiso -a sithole isivumelwano sobumnini wa-. Kusigaba 4, isivumelwano senhloko i- sihlangana lesakhi sesichasiso –a sithole isivumelwano sobumnini ya-.
Qedisa izigaba ezilandelayo. Mthetho bani ongawakha maqondana lokwakhiwa kwezivumelwano zobumnini? Khumbula okwenzakalayo uma kulandelana onkamisa.
