uMthunywa
Wayne Ncube
KULESELA eligqekeze kwesinye isitolo eTsholotsho latshontsha imali engange-US$3 500, R10 000
leP3 200 latshisa isitolo andubana litshayele amapholisa liwazisa ngomlilo lo, uMthunywa ukuzwile lokhu.
Kubikwa mhlaka 30 Mpandula uNkosazana Pretty Dube olesitolo esibizwa ngokuthi yiPretty General Dealer esisendaweni yamabhizimusi eTsholotsho wavala isitolo sakhe ngehola lesikhombisa ntambama watshiya imali ngaphansi komqamelo engaba yi-USD$3 500, R10 000, P3 200 kanye le-airtime ye-ZWL$26 380.
Kucatshangelwa ukuba phakathi kobusuku umetheswacala igama lakhe elilokhu lisagodliwe ngamapholisa wangena esitolo lesi ngophahla watshontsha imali kanye le-airtime andubana atshise isitolo.
Isikhulumi samapholisa esabelweni seMatabeleland North uChief Inspector Siphiwe Makonese uthe badingisise ngesela elatshontsha kwesinye isitolo eTsholotsho andubana litshiye lilumathise umlilo.
“Sisadingisisa ngecala lendoda engene kwesinye isitolo yatshontsha imali kanye le-airtime andubana itshiye ilumathise isitolo sikaNkszn Dube. Kukhanya wathi ephuma waphinda njalo watshayela uAssistant Inspector Chinyanyu ucingo emazisa ngomlilo lo esebenzisa inombolo ezibhalwe ngebizo lakhe.
“Ekufikeni kwamapholisa esitolo amapholisa kanye lezakhamizi behluleka ukubhula lo umlilo njalo kwatsha konke okwakusesitolo kwasala kungamalahle,” kuchaza uChief Insp Makonese.
Kubikwa amapholisa athi esemlonda bathola unkosikazi wakhe owathi upakitshe izikhwama njalo kazange achaze lapho ayakhona.
“Kungela sikhathi eside amapholisa ezwa udletshana lokuba useMatshudula Business Centre lapho abotshwa khona esesele le-USD$2 407, P1 225, kanye le R2 800 le airtime yonke yenele,” kuphetha uChief Insp Makonese.
