uMthunywa
Njengokuthembisa kwami kuviki ephelileyo lamuhla siqala ukufunda ngesandiso. Umbuzo wokuqala okumele siwuphendule ngothi: Siyini isandiso ngohlelo lwesiNdebele? Siphetha isifundo seviki ephelileyo sithe isandiso ngolunye ucezu lwenkulumo olungena ngaphansi kwesikhanyiso njengesenzukuthi.
Isikhanyiso ligama elikhanyisa isilandiso. Likhanyisa ngesenzo, ngesibanjalo, ngesichasiso loba ngesinye isikhanyiso (isandiso loba isenzukuthi). Izibonelo: Mbongeni yiphathe kahle lengane kaDonga. (kahle-yisikhanyiso, isandiso esikhanyisa ngesenzo (yiphathe). Yinsizwa ngempela uThemba.
(Yinsizwa yisibanjalo/ngempela yisikhanyiso esikhanyisa ngesibajalo yinsizwa.
Insimbi zamapholisa zamuthi nsi kakhulu. (nsi) yisenzukuthi. Uthandaza kahle kakhulu lo umfundisi (kahle) ngesinye isandiso.
Imihlobo yesandiso – Izandiso zendawo abanye bethi ngondaweni, (Ondaweni)’ izandiso zesimo lezandiso zesikhathi (zenkathi).
Ukwakhiwa kwesandiso sendawo (Ondaweni)- Ukwakhiwa kwezandiso zendawo emabizweni ezigaba 3-11, 14 lo 15. Kusigaba 3 ibizo /umfula’ isandiso sendawo ngu/emfuleni/. Kusigaba 4 kubizo imifula isandiso sendawo ngu/emfuleni/. Kusigaba 5 kubizo i-hhashi, isandiso ngu /ehhashini/.
Kusigaba 6 kubizo amatshe, isandiso ngu/ematsheni/. Kusigaba 7 kubizo isango, isandiso ngu/esangweni/.
Kusigaba 9 kubizo inja isandiso ngu/enjeni/. Kusigaba 11 kubizo uluthi isandiso sendawo ngu/eluthini/. Abanye ibizo kusigaba 11 ngu/uthi/ isandiso ngu/othini/. Kusigaba 14 kubizo ubuhlalu isandiso ngu/ebuhlalwini/. Kusigaba 15 kubizo ukufa isandiso ngu/ekufeni/.
Kuyini okuqatshelwayo ekwakheni isandiso sendawo? Sizaqala lapha kusikhathi esizayo.
